O Centro Enogastronómico da Fábrica da Luz contará cun deseño interior concibido para converter o histórico edificio da beira do Miño nun espazo plenamente operativo, preparado para acoller catas, showcookings, accións formativas especializadas e encontros profesionais vinculados á cultura gastronómica e vitivinícola. O proxecto define de maneira detallada a organización funcional do inmoble, estruturando as distintas áreas para permitir usos simultáneos e unha programación estable ao longo do ano.

O concelleiro de Desenvolvemento Local, Mauricio Repetto, subliñou que “non se trata simplemente dun deseño estético, senón da configuración dun equipamento estratéxico para a cidade, con planificación técnica, criterios de eficiencia e unha visión clara de sostibilidade económica e funcional”. O edil explicou que “cada zona foi pensada para cumprir unha finalidade concreta, desde a divulgación ata a formación profesional, garantindo que o centro sexa útil tanto para o sector como para a cidadanía”. Neste sentido, Repetto incidiu en que “este investimento público responde a unha estratexia de transformación que aposta polo talento local, pola promoción do produto e pola consolidación de Lugo como destino gastronómico de calidade”.

A actuación enmárcase dentro do Plan de Sostibilidade Turística en Destino (PSTD) “Et Edendo, Lucus: Un percorrido histórico pola enogastronomía”, para o que o Concello de Lugo acadou unha achega de 2 millóns de euros procedentes dos fondos europeos Next Generation, integrados no Plan de Recuperación, Transformación e Resiliencia. A rehabilitación integral do edificio foi adxudicada por 554.212,94 euros, e o proxecto de interiorismo completa esta intervención definindo o modelo funcional do futuro centro.

O deseño estrutúrase arredor dun eixo principal de circulación que organiza os percorridos e conecta visualmente as áreas expositivas, formativas e profesionais. Desde o acceso principal disporase unha zona de acollida e información que actuará como punto distribuidor cara ás distintas áreas.

O espazo de showcooking e formación contará con tres postos de cociña equipados con placas de indución de alta potencia (7.400 W), fornos encastrables ventilados, sistemas profesionais de extracción e campá mural en aceiro inoxidable, ademais de zonas de fregado, lavavaixelas e vinoteca especializada con capacidade para ata 78 botellas. Estes equipamentos permitirán desenvolver demostracións en directo, obradoiros e accións formativas con garantías técnicas e de seguridade.

Complementariamente, habilitaranse cinco mesas circulares de gran formato para catas e degustacións, con capacidade para grupos organizados, así como zonas de encontro profesional e áreas de traballo colaborativo destinadas a asociacións, produtores e entidades do sector. A disposición en planta favorece a flexibilidade, permitindo adaptar o centro á celebración de eventos, presentacións ou accións promocionais de distinta escala.

O proxecto incorpora criterios de sostibilidade e eficiencia enerxética coherentes coa rehabilitación arquitectónica executada baixo estándares de alto rendemento. Empregaranse solucións de iluminación LED de baixo consumo, materiais duradeiros e certificados, madeira con selo FSC e superficies minerais de alta resistencia e fácil mantemento, adecuadas para un uso público intensivo. Ademais, o deseño cumpre co Código Técnico da Edificación, coa normativa de accesibilidade universal e cos requisitos esixidos polo PRTR, incluído o principio de “non causar dano significativo” (DNSH).

Repetto salientou que “estamos a actuar con total transparencia e rigor técnico, detallando cada elemento que conformará o centro para garantir que desde o primeiro día funcione con solvencia e profesionalidade”. O concelleiro engadiu que “a Fábrica da Luz atópase actualmente na súa fase de máximo desenvolvemento, e este deseño interior culmina unha transformación que converte un edificio histórico nun equipamento moderno, eficiente e preparado para dinamizar a economía local desde a sostibilidade”.

O Centro Enogastronómico da Fábrica da Luz afronta así a súa recta final de execución cun modelo claramente definido, reforzando a integración entre patrimonio, territorio e desenvolvemento económico e consolidando unha infraestrutura chamada a desempeñar un papel clave na proxección gastronómica de Lugo.

Audio

• O concelleiro de Desenvolvemento Local, Mauricio Repetto, sobre a  Fábrica da Luz | Descargar mp3