A concelleira de Cultura, Turismo e Promoción da Lingua, Maite Ferreiro, anunciou que as Casas das Linguas Municipais María Balteira e Estrada da Granxa acollerán campamentos durante a Semana Santa. Segundo explicou Maite Ferreiro, “queremos facilitar a conciliación ás familias ao mesmo tempo que achegamos ás nenas e nenos a outras linguas de maneira lúdica”.

As actividades están dirixidas a nenas e nenos empadroados no Concello de Lugo nados entre 2016 e 2022, e desenvolveranse nas dúas Casas das Linguas os días 30 e 31 de marzo e 1 de abril, en horario de 09:30 a 13:30 horas. Co obxectivo de ofrecer maior flexibilidade ás familias, a entrada poderá realizarse entre as 09:00 e as 09:30 horas, mentres que a recollida poderá efectuarse entre as 13:30 e as 14:00 horas.

As actividades do campamento serán impartidas en inglés, francés e galego, cun enfoque lúdico que permitirá ás nenas e nenos achegarse ás linguas a través de xogos e dinámicas participativas. Ofertaranse 40 prazas en total, distribuídas en 20 prazas na Casa das Linguas María Balteira e 20 na Casa das Linguas da Estrada da Granxa.

O prazo de solicitude abrirase do 16 ao 20 de marzo a partir das 10:00 horas, e as prazas outorgaranse por rigorosa orde de inscrición. As solicitudes deberán realizarse por correo electrónico á Casa das Linguas na que se desexe participar: casa.linguas@lugo.gal para a Casa das Linguas da Estrada da Granxa e casa.linguas.balteira@lugo.gal para a Casa das Linguas María Balteira.

No correo de solicitude deberán indicarse o nome do alumno ou alumna, data de nacemento, quenda solicitada e teléfono de contacto, podendo inscribirse varios irmáns no mesmo correo.

A listaxe de admitidos publicarase o 23 de marzo, e o prazo para formalizar a inscrición permanecerá aberto ata o 26 de marzo, momento no que deberá presentarse a documentación necesaria.

Audio

• A concelleira de Cultura, Turismo e Promoción da Lingua, Maite Ferreiro, sobre os campamentos de Semana Santa | Descargar mp3