O alcalde de Lugo, Miguel Fernández, e o delegado do Goberno en Galicia, Pedro Blanco, avanzaron que o Executivo central iniciará o vindeiro mes de maio o procedemento para declarar O Vello Cárcere como Lugar de Memoria Democrática, un recoñecemento que permitirá consolidar este espazo como un dos grandes referentes da memoria histórica en Galicia.

Durante a visita ao edificio, na que tamén participou a subdelegada do Goberno na provincia, Olimpia López, o rexedor destacou que este anuncio “supón un paso fundamental para seguir dignificando un espazo que fala da nosa historia e do compromiso de Lugo cos valores democráticos”, incidindo no traballo desenvolvido polo Concello para recuperar e poñer en valor este inmoble. Pola súa banda, Pedro Blanco cualificou a iniciativa como “un acto de xustiza, reparación e dignidade”, subliñando a importancia de preservar a memoria das vítimas e trasladala ás novas xeracións.

Este avance chega tras o proceso impulsado polo Concello para acadar este recoñecemento, e permitirá que O Vello Cárcere se sume aos tres espazos xa declarados en Galicia, como o Pazo de Meirás, as Illas de San Simón e San Antón e a cidade de Ferrol, reforzando así o papel de Lugo no mapa da memoria democrática.

O delegado do Goberno puxo en valor o significado histórico do edificio, lembrando o seu papel como espazo de represión política durante a Guerra Civil e a posguerra, polo que pasaron milleiros de persoas en condicións de extrema dureza. “É fundamental explicar o que ocorreu para evitar que se repita e impedir que caia no esquecemento”, afirmou.

Pola súa banda, Miguel Fernández destacou a transformación do inmoble, que pasou de ser un símbolo de dor e represión a converterse nun centro cultural aberto á cidadanía. “Hoxe é un espazo vivo, que promove a reflexión crítica sobre o pasado e contribúe a construír unha sociedade máis xusta e máis libre”, sinalou.

Ambos representantes coincidiron en subliñar a importancia da colaboración institucional para facer realidade este tipo de proxectos. “Cando hai diálogo e cooperación, os proxectos avanzan”, indicou o delegado, quen tamén puxo en valor o compromiso do Goberno con Lugo.

Neste contexto, o alcalde agradeceu a implicación do Executivo central e destacou que este recoñecemento permitirá reforzar a programación e a proxección do Vello Cárcere, ademais de abrir novas oportunidades de financiamento e divulgación.

A declaración como Lugar de Memoria Democrática suporá un paso máis na posta en valor deste espazo, consolidando o compromiso de Lugo coa memoria, a xustiza histórica e a defensa dos valores democráticos.

Audio

• O alcalde de Lugo, Miguel Fernández, sobre o Vello Cárcere e a memoria democrática | Descargar mp3