O Concello de Lugo executará o vindeiro venres, 20 de marzo, traballos de limpeza de terra e pedras desprendidas dun noiro no acceso desde a estrada Nacional VI cara á Volta da Viña, nas inmediacións do Balneario.

A intervención, coordinada pola Área de Transición Ecolóxica, responde á necesidade de retirar os materiais acumulados na zona tras desprendementos recentes, co obxectivo de garantir condicións adecuadas de seguridade tanto para a circulación como para as persoas usuarias da vía.

Os traballos desenvolveranse nun período estimado dunha hora, entre as 09:30 e as 10:30 horas, e requirirán a ocupación puntual da vía para a execución das tarefas con medios municipais.

Plan de tráfico

Para permitir o desenvolvemento da actuación será necesario restrinxir temporalmente o acceso desde a N-6 cara á rúa Santiago, no sentido de circulación en dirección A Coruña.

Durante o tempo de execución dos traballos:

• Cortarase o tránsito de vehículos no acceso afectado
• Establecerase sinalización de obra e restrición de paso
• Habilitarase un itinerario obrigatorio alternativo mediante desvío

En concreto, instalaranse sinais de perigo por obras, dirección prohibida e indicación de paso obrigatorio cara á esquerda no punto de acceso desde a Nacional VI.

O operativo incluirá tamén a delimitación da zona de traballo mediante valado e a instalación de sinalización visible en todos os accesos, co obxectivo de garantir a seguridade viaria durante a intervención.

Así mesmo, garantirase en todo momento o tránsito peonil e o acceso ás vivendas e espazos da contorna en condicións de seguridade.

No caso de que as condicións meteorolóxicas impidan a execución dos traballos na data prevista, comunicarase con antelación unha nova data para o desenvolvemento da actuación.

Desde o Concello recoméndase ás persoas condutoras que extremen a precaución na zona e que sigan as indicacións da sinalización provisional e da Policía Local.