Máis de 560 alumnos de 8 centros da cidade participaron durante os anos 2014 e 2015 nos talleres de prevención de violencia de xénero organizados pola Concellería de Benestar Social, Igualdade e Inclusión, que dirixe Ana González Abelleira. Trátase dun programa de intervención social que se desenvolve nas propias aulas e que pretende concienciar aos mozos e mozas sobre a desigualdade social entre mulleres e homes e incorporar a loita contra o sexismo e a violencia como valores básicos.

A problemática da violencia de xénero tamén está presente nas relacións dos máis mozos. Máis de 1.000 rapaces menores de 18 anos foron a xuízo por delitos ou faltas de violencia de xénero en España dende 2007. “É dende a educación como podemos previr este tipo de terrorismo, que no pasado 2015 acabou coa vida de 56 mulleres e 3 menores, e no que vai de 2016 asasinou a tres”, asegurou a edil.

Resultados satisfactorios

Ana Abelleira mostrouse satisfeita dos resultados obtidos con estes talleres, xa que “máis dun 74% dos asistentes mellorou o seus coñecementos en materia de xénero, polo que o Concello quere seguir organizando e realizando estas actividades e seguir reivindicando que se lle devolvan aos Concellos as competencias en materia de igualdade e contra a violencia de xénero para acadar a tan ansiada igualdade real e efectiva pola que traballamos dende a Concellería”, subliñou Abelleira.

En total, recibiron formación 310 alumnos de Educación Secundaria Obligatoria dos institutos Sanxillao, Xoán Montes e Lucus Augusti; e 255 alumnos dos centros escolares Rosalía de Castro, Virxe da Soidade, Casás, Quiroga Ballesteros e Illa Verde. Hai que sumarlle a participación de 15 usuarios da ANPA de Rosalía de Castro.

Audio

• Ana Abelleira, sobre os talleres de loita contra a violencia machista|Descargar mp3