- Tema
A Alcaldesa de Lugo, Lara Méndez, e o Concelleiro de Educación, Manuel Núñez, participaron na entrega este venres dos diplomas de participación aos 50 nenos e nenas de entre 8 e 14 anos de idade que asistiron ás actividades dos VII Cursos Primavera Segura, impartidos no Parque Infantil de Tráfico (PIT) do Concello durante os meses de abril e maio. Os rapaces e rapazas recibiron tamén como agasallo un lapis de memoria. No acto tomaron parte así mesmo Ángel Álvarez, representante da Xefatura Provincial de Tráfico, Jesús Losada, un dos monitores do PIT, e representantes da Corporación.
Con esta iniciativa, o Concello, coa colaboración da Dirección Xeral de Tráfico, continúa fomentando a educación viaria entre os nenos e nenas, co obxectivo de que adquiran condutas seguras como peóns e viaxeiros, e como usuarios do transporte público e privado, así como aspectos sobre tráfico, hábitos correctos e seguros tanto en vías urbanas como interurbanas, e situacións de tráfico reais. En grupos de 15, reciben formación teórica e práctica durante máis dunha semana en cada edición das actividades.
Precisamente hoxe abriuse o prazo de inscrición nos cursos de educación viaria de verán, que tamén terán lugar no PIT. Pode facerse tanto no Parque Infantil de Tráfico como na Dirección Xeral de Tráfico.