O alcalde de Lugo, Miguel Fernández, recibiu á karateca Uxía Folgueira, que ven de lograr hai escasos días a medalla de prata no Campionato Europeo disputado en Chipre, na categoría cadete - júnior de kata, como integrante da Selección Española de Karate. O rexedor municipal, que estivo acompañado polo concelleiro de Deportes, Jorge Bustos, felicitouna por estes excelentes resultados, que se suman a outros logros deportivos acadados ao longo da pasada tempada, entre os que destacan as dúas medallas obtidas na Youth League, a liga mundial para mozos e mozas karatecas. Miguel Fernández sinalou que “é todo un orgullo que deportistas da talla de Uxía Folgueira leven o nome de Lugo aos distintos compromisos a nivel nacional, europeo e mundial”, ao tempo que destacou os valores que representa esta deportista, “como o compromiso, o traballo e a superación”. 
 
Tamén fixo referencia a importancia que está a ter na súa traxectoria e logros deportivos o club Shihan, no que adestra desde que tiña catro anos. Por último o alcalde desexoulle moitos éxitos na súa carreira deportiva, na que xa conta con importantes logros, posto que con só 14 anos xa é un referente nacional na súa disciplina, ademais de ser a única galega en lograr dous medallas no Mundial de kata, na denominada Youth League, e campiona en todas as categorías autonómicas nas que competiu, tanto en kata como en kumite.