A alcaldesa de Lugo, Elena Candia, recibiu no Concello o equipo de Atalaya Comunicación y Publicidad, axencia lucense que volve situarse entre as finalistas dos Premios Paraugas, promovidos polo Clúster da Comunicación de Galicia.

 

Nesta edición, a empresa opta ao recoñecemento na categoría de Mellor Acción de Comunicación ou Márketing de Impacto Positivo polo proxecto «Morte Segura», desenvolvido xunto a Serfuja, que aborda a comunicación arredor dos falecementos e busca romper silencios e derrubar mitos sobre unha realidade que forma parte da vida.

 

Esta é a terceira ocasión nos últimos cinco anos na que Atalaya alcanza a fase final destes premios, un recoñecemento á súa creatividade e á capacidade de desenvolver iniciativas con repercusión social.

 

A alcaldesa trasladou ao equipo os seus parabéns por esta nominación e puxo en valor a contribución de empresas lucenses como esta, que desenvolven iniciativas innovadoras e sitúan o nome de Lugo no ámbito da comunicación galega.