Agaxede distinguirá ao Club Ciclista Cidade de Lugo como mellor programa deportivo e a Muller en Forma, co premio á xestión deportiva con perspectiva de xénero.
O alcalde e o edil de Deportes reuníronse cos responsables de Agaxede para ultimar detalles da gala que premiará a deportistas, clubs e administracións galegas.
Miguel Fernández e Jorge Bustos destacaron a importancia duns galardóns que premian a dirección deportiva e insistiron en que “son exemplo para que as administracións continuemos a traballar neste eido”.
O Concello de Lugo converterase mañá venres no anfitrión da gala da Asociación Galega de Xestión Deportiva, que fará entrega dos premios da súa decimo sexta edición, a partir das 20.00 horas no auditorio Fuxan os Ventos. Agaxede distinguirá entre a concesión dos 13 premios deste ano, ao Club Ciclista Cidade de Lugo como mellor programa deportivo, e ao programa Muller en Forma, co premio á xestión deportiva con perspectiva de xénero. Tanto o alcalde, Miguel Fernández, como o edil de Deportes, Jorge Bustos, reuníronse cos resposables de Agaxede para ultimar detalles da gala coa que se distingue a deportistas, clubs e administracións galegas.
O rexedor municipal lembrou que “será unha honra acoller a entrega destes galardóns, que xa distinguiron en dúas ocasións ao Concello de Lugo co Premio á Mellor Xestión Pública do Deporte, e que este ano, ademais, van premiar ao Club Ciclista Cidade de Lugo; ao programa Muller en Forma e á Deputación de Lugo”.
Miguel Fernández e Jorge Bustos mantiveron unha reunión co presidente de Agaxede, Eduardo Blanco, e co coordinador da entidade, Cristián Gavril, para ultimar aspectos deste evento, que xa é unha referencia no sector deportivo e en todo o que atinxe á xestión e á dirección de clubs e de administracións públicas galegas no eido do deporte.