A área de Deportes do Concello de Lugo ven de ampliar en 70 as prazas dos cursos de ximnasia e natación para maiores de 65 anos, que se desenvolven ao longo do ano nas piscinas municipais de Frigsa e As Pedreiras. Estas 70 prazas se suman ás 330 ofertadas a finais de agosto e que se esgotaron nas primeiras xornadas, dada a gran aceptación destes cursos, que constan de tres sesións á semana por un custo anual de 7,90 euros.

Desde a concellería de dirixe Jorge Bustos ofértanse agora 50 prazas máis para a piscina de Frigsa, distribuídas entre os cinco grupos xa existentes, mentres que nas instalacións de As Pedreiras crease un novo grupo con 20 prazas en horario de  12.00 a 12.45 horas. A matrícula para estas novas 70 prazas deberá realizarse os días 24,25 e 26 de setembro nas oficinas de Frigsa, en horario de 8.00 a 14.00 horas, co pago deses 7,90 euros, mediante tarxeta bancaria ou mediante o ingreso en conta bancaria, presentando para iso o formulario correspondente que se pode obter nas mesmas oficinas.

O edil de Deportes, Jorge Bustos, sinala que “esta é unha das actividades de máis aceptación, polo que as prazas quedaron cubertas moi rapidamente nos primeiros días de setembro e varias persoas quedaron sen posibilidade de matricularse nestes cursos. Desde o Goberno Local decidimos facer un esforzo e ampliar as prazas nestas clases de ximnasia e natación en 70, o que fará un total de 400 prazas dirixidas aos maiores de 65 anos. Estamos satisfeitos porque é unha forma de contribuír ao ocio activo e saudable dos nosos maiores”.

A área de Deportes ofertou a primeiros de mes unhas 1.000 prazas para o primeiro trimestre dos cursos de natación nas piscinas de Frigsa e As Pedreiras, para diferentes idades e niveis. A maiores destes prazas, tamén puxo a disposición da cidadanía as clases destinadas a maiores de 65 anos, que combinan ximnasia e natación con tres sesións semanais.