A concellería de Educación e Difusión do Coñecemento achegará máscaras aos centros de ensino públicos da cidade para facilitar que todas as familias poidan cumplir coas medidas sanitarias de cara á volta ás clases. Felipe Rivas explicou que “o custo das máscaras pode ser inasumible para unha familia que esté pasando por unha situación económica delicada”, e engadiu “desde a Concellería de Educación colaboraremos cos centros para que todas as nenas e nenos de Lugo poidan cumplir coas medidas de prevención, xa que a Xunta non cumple coa súa responsabilidade en educación nin aporta medios de protección suficientes para cumplir con estas medidas”.

“Non é a primeira vez que temos que cubrir desde o Concello as deficiencias de planificación da Xunta de Galiza”, afirmou Felipe Rivas. O edil de Educación lembrou que “durante o inicio do confinamento tivemos que poñer en marcha un servizo de impresión a demanda para permitir que as familias con menores recursos puideran ter acceso ao material didáctico e continuar así coa formación desde a casa”.

“Este mércores vimos no discurso de Investidura a Feijóo presumindo de bo xestor ao mesmo tempo que deixaba de lado aos centros de ensino e aos fogares con menos recursos”, afirmou Felipe Rivas, que engadiu “desde o concello de Lugo temos claro que a saúde das nenas e nenos é a máxima prioridade de cara á volta ás clases”.