A Alcaldesa de Lugo, Paula Alvarellos, entregou hoxe a Escoba de Platino ao persoal do servizo de limpeza da cidade, nun acto que contou tamén coa presenza de Miguel Fernández, concelleiro de Transición Ecolóxica. A rexedora expresou o seu agradecemento a todo o equipo, destacando a importancia do seu labor diario: "É unha honra para min facervos entrega dun recoñecemento que nos sitúa entre as cidades máis limpas e con mellor xestión de residuos de España, xunto a referentes como Vitoria ou San Sebastián."

O galardón, outorgado pola Asociación Técnica para a Xestión de Residuos, Aseo Urbano e Medio Ambiente (ATEGRUS), recoñeceu hai menos de un mes a renovación do servizo de recollida de Residuos Sólidos Urbanos (RSU), limpeza viaria e xestión do punto limpo impulsada polo Goberno local. A Escoba de Platino é a máxima distinción neste prestixioso certame de ámbito estatal e iberoamericano.

O xurado de expertos valorou diversos aspectos para conceder este recoñecemento ao Concello de Lugo, tales como o uso de vehículos e maquinaria medioambientalmente sostibles, a transición ao sistema de carga lateral nos colectores, a apertura dunha oficina de atención ao cidadán e a implementación do servizo de punto limpo móbil.

A alcaldesa subliñou que este premio é un testemuño do arduo traballo e dedicación do equipo de EcoLugo: "Vós sodes os verdadeiros artífices deste logro. Cada un dos labores que levades a cabo no día a día reflicten o voso compromiso coa excelencia, algo que a propia veciñanza tamén percibe: subimos no último ano 25 postos no ranking da OCU sobre limpeza urbana".

Pola súa banda, Miguel Fernández destacou os avances na concienciación cidadá e a tendencia á alza nas cifras de reciclaxe: "Non só o traballo sobre o terreo da resultados, tamén se acadaron mellores hábitos da cidadanía grazas á concienciación: a reciclaxe na bolsa amarela non para de crecer cun 18% máis nos primeiros cinco meses de 2024 e un 15% no papel e cartón".

Por último, a rexedora animou a todo o cadro de persoal a seguir traballando en equipo: "Esta Escoba de Platino é moito máis ca un trofeo. É un estímulo para seguir traballando, para seguir mellorando e para continuar facendo de Lugo un exemplo de respecto polo medio ambiente. Grazas a cada un de vós polo voso esforzo e dedicación. Este premio é voso. Seguimos traballando en equipo por un Lugo mellor".

O recoñecemento de ATEGRUS sitúa a Lugo como unha das cidades máis limpas de España, consolidando o compromiso do Executivo de Paula Alvarellos coa sostibilidade e o respecto polo medio ambiente.

Audio

• A alcaldesa de Lugo, Paula Alvarellos, sobre a Escoba de Platino | Descargar mp3
• O concelleiro de Transición Ecolóxica, Miguel Fernández, sobre a Escoba de Platino | Descargar mp3