O Concello de Lugo informa de que a área de Transición Ecolóxica vén de rematar os traballos de renovación do pavimento no Parque Rosalía de Castro, unha das zonas verdes máis emblemáticas e queridas pola cidadanía. Esta actuación enmárcase no conxunto de melloras impulsadas polo Goberno local co obxectivo de poñer en valor este espazo histórico de cara á súa futura declaración como Ben de Interese Cultural (BIC).

Os traballos consistiron principalmente na nivelación do terreo e na renovación do firme mediante a aplicación dunha capa de grava semellante á existente. Esta intervención realizouse respectando coidadosamente a estética orixinal do parque, mantendo o seu carácter tradicional e a súa integración paisaxística. A nivelación permitiu corrixir irregularidades e mellorar a accesibilidade dos camiños, mentres que a reposición do firme garante unha maior durabilidade e confort para as persoas usuarias.

Con esta actuación búscase non só mellorar a imaxe do parque, senón tamén optimizar o uso dos seus percorridos peonís, favorecendo paseos máis cómodos e seguros nun contorno natural de alto valor ambiental e patrimonial.

O Parque Rosalía de Castro constitúe un dos principais pulmóns verdes da cidade e un espazo de grande relevancia histórica. Situado nun emprazamento privilexiado, destaca polas súas amplas zonas axardinadas, a súa variada flora e a presenza dun arborado singular, con especies de grande porte e antigüidade. Ademais, o parque conta con elementos arquitectónicos e paisaxísticos que reflicten distintas etapas da súa evolución, converténdoo nun enclave de especial interese cultural e turístico.

O alcalde, Miguel Fernández, valorou moi positivamente a finalización destes traballos, sinalando que “seguimos avanzando na recuperación e mellora dun dos espazos máis representativos da nosa cidade. Esta actuación demostra o noso compromiso coa conservación do patrimonio natural e coa calidade de vida da veciñanza”. Así mesmo, destacou que “a futura declaración como Ben de Interese Cultural reforzará a protección do parque e permitirá seguir impulsando actuacións respectuosas coa súa historia e identidade”.

O Goberno local continuará desenvolvendo novas intervencións no parque nos vindeiros meses. Tras a rehabilitación da columna danada, a conservación e mantemento da diversa flora e do arborado existente, proseguirase cunha actuación integral sobre o muro perimetral que linda coas costas do parque, que será adecentado e pintado nos próximos meses para mellorar a súa integración visual.

Estas actuacións forman parte dunha estratexia global de mellora e conservación que ten como obxectivo consolidar o Parque Rosalía de Castro como un espazo de referencia, combinando o seu valor histórico, natural e social.

O Concello reafirma así o seu compromiso coa protección e posta en valor dos espazos públicos, apostando por unha cidade máis sostible, accesible e respectuosa co seu patrimonio.