O Concello de Lugo poñerá a disposición da cidadanía o novo treito da rúa Montevideo a partir do 16 de maio, unha vez finalizadas as principais tarefas de peonalización previstas no proxecto ‘Lugo Corazón Verde’. Esta apertura permitirá recuperar a práctica totalidade da rúa para o uso veciñal, co obxectivo de mellorar a mobilidade e a calidade urbana do centro histórico.

O ámbito que se porá en servizo inclúe as rúas Montevideo, Ramón y Cajal, Quiroga Ballesteros, Amor Meilán e o tramo de Bolaño Rivadeneira comprendido entre o número 19 e a Praza de Ferrol. Estes espazos encóntranse xa en condicións de ser utilizados con seguridade pola veciñanza, mentres se ultiman os últimos detalles propios da fase de remate dunha obra deste tipo.

As intervencións pendentes nestes treitos refírense á instalación dalgúns elementos de mobiliario urbano como balizas, papeleiras, bolardos e aparcamentos para bicicletas, así como axustes menores en parterres e alcorques. Nestes últimos, realizaranse labores complementarias como reforzos estruturais e aplicación de pintura en acabado tipo aceiro corten. Tamén se levarán a cabo traballos puntuais como o axuste de tapas, a limpeza xeral da vía ou a instalación dun portalón nunha parcela de Montevideo, actualmente utilizada como zona de acopio.

Estas accións non afectan á posta en servizo da rúa, xa que a súa execución é compatible co tránsito e o uso habitual da vía pública. Trátase de remates menores que completan unha actuación que xa cumpre cos criterios de seguridade e accesibilidade, segundo o previsto no Plan de Seguridade e a normativa vixente.

Só quedará pendente a intervención nun punto concreto da rúa Bolaño Rivadeneira, entre o número 19 e a rúa Nova, onde se localizaron recentemente restos arqueolóxicos de época romana. A actuación neste ámbito está a desenvolverse baixo a supervisión da dirección arqueolóxica da obra, respectando en todo momento os protocolos establecidos para a documentación, estudo e protección deste tipo de elementos patrimoniais.

A actuación na rúa Montevideo foi concibida como unha mellora integral do espazo público, cun deseño accesible, funcional e sostible, que incorpora as achegas recollidas polo Goberno local a través de visitas a pé de rúa e encontros co tecido asociativo. Estes procesos de participación permitiron consensuar cuestións como a ubicación das novas árbores, a distribución do mobiliario urbano ou o deseño dos espazos de descanso, consolidando así un modelo de cidade máis humana e coidada.

Esta obra forma parte das actuacións executadas con financiamento dos Fondos Europeos NextGenerationEU, xunto coas da Praza de Ferrol e Santo Domingo, co obxectivo de avanzar cara unha peonalización integral do centro histórico e establecer o ámbito da futura Zona de Baixas Emisións (ZBE). O Concello pon así a disposición da veciñanza todo o ámbito posible da intervención a partir do 16 de maio, dando cumprimento ao compromiso adquirido polo alcalde, a falta de rematar os pequenos detalles detectados durante a visita técnica, que constan na acta de comprobación da obra. Só queda por executar o treito final de Bolaño Rivadeneira, onde se continúa traballando ao ritmo marcado pola dirección arqueolóxica tras a aparición recente de restos de valor patrimonial.