Concello de Lugo e CONFEMAC únense fronte á violencia machista na Terceira Idade

Baixo o lema "Non somos invisibles: idadismo e machismo", a área de Benestar Social súmase á iniciativa estatal e pon en marcha unha campaña de concienciación para fomentar o rexeitamento social a este tipo de condutas.

Luns, 14 de novembro de 2022
Fonte: 
Gabinete de Prensa
Concello de Lugo e CONFEMAC únense fronte á violencia machista na Terceira Idade

Con motivo do Día Internacional da Eliminación da Violencia contra as Mulleres, o Executivo de Lara Méndez, a través da Concellería de Benestar Social, Inclusión e Persoas Maiores, que dirixe Olga López Racamonde, realiza unha campaña para poñer de manifesto a invisibilidade que padecen as mulleres de maior idade, que é dobre: a discriminación que sufren polo feito de ser mulleres e tamén pola súa idade.

Baixo o lema "Non somos invisibles: idadismo e machismo", esta acción busca exaltar os dereitos das mulleres maiores, que son os mesmos que os das mulleres de calquera outra idade, posto que independentemente da idade, as mulleres teñen dereito a ser respetadas, libres, a vivir a vida e a tomar as súas propias decisións, tal e como explicou Olga López. A Concellería instalará diversos mupis en distintos puntos da cidade con esta campaña, ademais de difundila nas redes sociais e nos centros de convivencia municipais.

Durante o que vai de ano, 38 mulleres foron asasinadas, 4 delas tiñan máis de 60 anos e podemos contar cinco máis se temos en conta a franxa dende os 51 anos, o que supón case un 24% do total. Esas cifras amosan a importancia de realizar campañas deste tipo.

Esta é unha das oito campañas, que no marco do lema "Persoas maiores, cos mesmos dereitos", puxo en marcha CONFEMAC, xunto a municipios de todo o territorio nacional, ata finais de ano.

Noticias relacionadas