O Executivo de Lara Méndez, a través da área de Benestar Social, que dirixe Olga López Racamonde, ofrecerá en 2022 até un total de 41.691 menús dentro do servizo de Xantar no Fogar que elevará a súa consignación até os 210.423 euros anuais.

Este orzamento incrementa en máis dun 144% o da licitación anterior (86.000 €), logo do crecemento da demanda que trouxo consigo a crise sanitaria.

“Actualmente, ao redor dun cento de persoas se benefician desta prestación municipal da que, agardamos, poder ampliar aínda máis a súa cobertura co obxectivo de atender os novos tipos de dependencia que ocasionou a pandemia, que fixo agromar carencias non só económicas senón tamén de coidados e alimentación”, sinalou a concelleira.

Así, este próximo mércores, a Xunta de Goberno adxudicará o contrato á empresa Alimentación Saludable Gallega S.L que presentou a oferta máis vantaxosa dentro da que se inclúen, “todas as melloras recollidas nos pregos e coas que pretendemos acrecentar a nosa capacidade e que esta se traduza, tamén, nunha maior calidade de vida para todas e todos os usuarios do programa”, indicou López Racamonde.

A edil referiu algúns dos aspectos concretos nos que redundará a nova licitación, de maneira que “aumenta a variedade de dietas con catro novas opcións: vexeteriana, vegana, sen carne de porco e sen carne de vaca; a rotación dos menús será cada 6 semanas no canto das 3 que se facía agora e se entregarán tres veces á semana, en lugar dos dous días de reparto que estaban establecidos até o momento. Cada beneficiario/a recibirá ademais un litro de leite e outro de zumo de frutas á semana e disporemos de 4 novas neveiras para poder cederlles a aquelas familias que non teñan outra maneira de garantir a conservación dos alimentos que se lles entregan”.

Olga López informou, así mesmo, de que a empresa encargada de prestar o servizo municipal preparará cada mañá os pratos de todas e todos os comensais, respectando as indicacións sanitarias que recolle o seu historial clínico.

“Manténdose sempre un estrito control sobre a elaboración e a calidade dos ingredientes que deben combinarse dun xeito saudable respectando as pautas médicas que figuran no expediente de cada beneficiario”. explica a responsable de Benestar.

A responsable de Benestar explicou que, con relación ao perfil maioritario das e dos usuarios, “en torno ao 60%, son mulleres, maiores de 65 anos, que viven soas e ás que, logo do confinamento obrigado que impuxo o Estado de Alarma, a permanencia do COVID as mantén nun illamento aconsellable ante o risco de contaxio”.

As políticas desenvolvidas polo Goberno de Lara Méndez tiveron, neste tempo, a vocación de dispensar unha atención integral á veciñanza.

“Dende a área de Benestar procuramos cubrir as necesidades asistenciais das e dos nosos maiores, mellorando o seu coidado e calidade de vida pero contribuíndo tamén a que se desenvolvan con autonomía e poidan permanecer nos seus fogares co fin de que manteñan o seu arraigamento e o contacto coa comunidade veciñal á que pertencen”, subliñou López Racamonde.

No Concello de Lugo hai 5.000 persoas maiores de 65 anos que residen soas nas súas vivendas e sobre as que, dende a área de Benestar, se realiza un seguimento continuado co fin de informalos dos recursos que teñen á súa disposición en función das necesidades que presenten e que inclúe tanto a súa manutención, cunha dieta equilibrada e acorde ao seu estado de saúde, como a axuda para a realización das tarefas domésticas, a dinamización sociocultural específica e mesmo o acompañamento telefónico para evitar a súa exclusión ou illamento social.

Audio

• Olga López, sobre o servizo Xantar no Fogar | Descargar mp3