Segundo as últimas estatísticas, máis de 5.500 veciños de Lugo son inmigrantes

A Concelleira de Benestar Social e Igualdade, Ana González Abelleira, presentou hoxe os VI Encontros das Culturas, organizados polo Concello e que terán lugar os días, 20. 21, 22, 23 e 24 de maio.

González Abelleira explicou que a súa Concellería ten entre os seus obxectivos “sensibilizar á poboación de Lugo sobre o fenómeno migratorio e axudar a darlle unha imaxe positiva á inmigración”. A Concelleira manifestou que, segundo as últimas estatísticas, en Lugo están empadroadas 5.541 persoas inmigrantes.

Para cumprir con estes obxectivos, indicou, o Concello organiza anualmente os “Encontros das culturas” nos que se programan actividades de tipo intercultural onde se dan a coñecer outras culturas, onde se trata de fomentar a perda do medo cara o descoñecido e o respecto entre todas as culturas.

Ana González destacou tamén que “ademais queremos informar ás persoas inmigrantes dos dereitos e da situacións actual en materia xurídica e de sanidade despois dos recortes levados a cabo polo goberno de Rajoy”.

Programa

A programación comezará o luns 20 ás 19:00 horas coa proxección dun documental Camiños de paz: as outras voces de Israel-Palestina producido pola Asociación Galega de Reporteiros Solidarios e a Asemblea de Cooperación pola Paz. Na presentación do documental participará Alejandro Quiñoá Casteleiros e o operador de cámara do documental Hugo Fernández Balseiro. Ao remate do acto que terá lugar no Centro de Convivencia Uxío Novoneyra, haberá unha degustación de comida árabe e inaugurarase unha exposición fotográfica co mesmo nome do documental.

O martes 21 celébrase o Día Mundial da Diversidade Cultural para o Diálogo e Desenvolvemento coa inauguración da exposición Imaxes con Fondo e a presentación do documental O fondo galego:compromiso coa solidariedade a cargo de Carmen Novas, responsable de comunicación do Fondo Galego e voluntaria da Asociación Galega de Reporteiro Solidarios. Os actos comezan ás 19.00 horas no Centro de Convivencia de Fingoi.
A exposición de fotografías, que poderá visitarse ata o 26 de maio, pretende promover a reflexión, o pensamento crítico e un cambio de actitude dentro da nosa sociedade, por medio da palabra e a imaxe. Deseñada polo debuxante Pepe Carreiro, está conformada por 19 obras que apostan polas condutas solidarias e respectuosas coa contorna e coas persoas que nela habitan. A solidariedade interxeneracional, o aforro enerxético, o respecto ambiental, o consumismo, a prostitución, a explotación laboral, a crise alimentaria e as desigualdades Norte-Sur son algunhas das temáticas abordadas.

O mércores 22 de maio as actividades están dirixidas para o público máis pequeno xa que se levará a cabo o contacontos A música das árbores, unha viaxe conto musical do Courel a Bangladesh de Anxo Moure. Será ás 17.00 horas no Centro Convivencia Maruja Mallo e ás 19.00 no Centro Convivencia Uxío Novoneyra.

O 23 de maio Nieves Pazos, Zita Méndez e Isabel Ozores Sieira impartirán diferentes charlas informativas sobre o dereito a atención sanitaria e novidades en estranxeiría ás 19.00 horas no Centro Convivencia Uxío Novoneyra.

Finalmente, ás 19.30 da tarde do venres 24, celebrase, no Centro de Convivencia de Fingoi o Concerto Entre Culturas da man do músico uruguaio, Walter César López, que coa súa música fará un percorrido por diferentes zonas de Uruguai da man de Alfredo Zitarrosa.