O artista Yoe33 executou o mural, comisariado por Concepto Circo e Diego As, nun proxecto moi participativo e que reflicte a poboación deste barrio lucense.
“O arte urbano é unha ferramenta fundamental para rexenerar a contorna pública da nosa cidade. Desde o noso goberno seguiremos promovendo este tipo de creación artísitica para embelecer os noso barrios”, sinalou o rexedor.
Lugo consolídase como unha das referencias europeas a través do programa Urban Cores, con máis dunha ducia de intervencións artísticas nos últimos anos, algunhas delas xa parte do patrimonio histórico artístico da cidade.
O alcalde de Lugo, Miguel Fernández, visitou hoxe a Praza do Castiñeiro para coñecer de primeira man a recente renovación do espazo, protagonizada por un mural de gran formato realizado polo artista Yoe33, e comisariado por Concepto Circo e Diego As. O mural que está a piques de rematar é un deseño de Manuel Pallín, realizado para darlle un lavado a esta emblemática praza lucense, que ata de agora lucía un mural moi deteriorado debido ás peculiaridades da superficie e ás inclemencias ambientais. A obra, de temática familiar, dotará de cor e luz á contorna, combinando elementos de ilustracións cun gran ceo, para pechar unha intervención artística moi participativa e na que se intentou reflectir a poboación deste barrio lucense.
Ademais, para garantir unha mellor conservación da obra, o muro foi sometido a tratamentos previos e posteriores. Esto permitirá non só un maior grao de resistencia, senón que en caso de danarse algunha zona, a reparación será moito máis sinxela, pola calidade e características dos materiais empregados.
“O arte urbano é unha ferramenta fundamental para rexenerar os grandes espazos públicos de todos os barrios da nosa cidade. Permítenos dar nova vida a lugares que forman parte da vida cotiá dos veciños e veciñas, ao tempo que os converte en espazos de encontro, creatividade e orgullo compartido”, sinalou o rexedor.
Fernández engadiu que “a paisaxe urbana é un magnífico lenzo para a expresión cultural. Cada intervención artística axúdanos a fortalecer o sentimento de pertenza a Lugo, a poñer en valor o noso patrimonio e as nosas raíces, e a transmitir os valores dunha sociedade máis igualitaria, xusta e consciente da súa orixe. Con proxectos coma este achegamos a cultura á rúa, facéndoa accesíbel para todas e todos”, subliñou o alcalde, ao tempo que destacou que “ademais de rexenerar rúas e prazas, estamos a poñer en valor o excelente nivel de artistas locais, tanto consolidados como emerxentes”.
Así mesmo, o rexedor quixo agradecer de forma especial o traballo e a implicación de Manuel Pallín neste proxecto e lembrou que “nos últimos anos desenvolvéronse en Lugo máis dunha ducia de intervencións de arte urbano dentro do programa Urban Cores, que puxeron en valor zonas emblemáticas dos barrios lucenses e que nos sitúan, segundo recoñecen as organizacións máis prestixiosas do sector, entre a elite das cidades europeas nesta disciplina artística”.
