Muller e Igualdade fomenta neste Nadal os xogos e xoguetes non sexistas coa difusión da guía Xogamos pola Igualdade

O Executivo de Lara Méndez desenvolverá nas vindeiras semanas accións de sensibilización animando ás familias a unha escolla responsable dos xoguetes.

A publicación recomenda que os regalos sexan libres de prexuízos sexistas, potencien o desenvolvemento de todo tipo de habilidades, propicien o xogo cooperativo e estimulen a creatividade e curiosidade.

Levaranse a cabo accións de sensibilización, coa difunsión carteis e folletos cun código QR que dará acceso a dita guía, tamén dispoñible na páxina web municipal http://concellodelugo.gal/sites/default/files/guia_xogamos_igualdade.pdf

Xoves, 16 de decembro de 2021
Fonte: 
Gabinete de Prensa
Muller e Igualdade fomenta neste Nadal os xogos e xoguetes non sexistas coa difusión da guía Xogamos pola Igualdade

O Executivo de Lara Méndez, a través da área de Muller e Igualdade que dirixe Silvia Alonso, retoma un Nadal máis a súa campaña para fomentar os xogos e xoguetes non sexistas.

“O obxectivo é concienciar á cidadanía e promover a igualdade de oportunidades dende idades temperás para que as nenas e nenos poidan decidir sobre os xogos e xoguetes que máis lles gustan sen que a súa elección teña connotacións de xénero”, explicou a concelleira Silvia Alonso. A iniciativa, segundo referiu a edil, céntrase en apelar á responsabilidade das familias á hora de escoller os regalos para as crianzas.

“A Casa da Muller do Concello de Lugo editou a guía Xogamos pola Igualdade na que se recollen 10 claves ou aspectos a ter en conta para unha libre de prexuízos sexistas, que priorice xogos potenciadores de todo tipo de habilidades, que fomenten a igualdade e a comunicación entre nenos e nenas participantes e que propicien o xogo cooperativo e sen actitudes violentas”, referiu a responsable de Muller.

A Concellería levará a cabo accións de sensibilización e difundirá carteis e folletos cun código QR que dará acceso á devandita guía, tamén dispoñible na páxina web municipal http://concellodelugo.gal/sites/default/files/guia_xogamos_igualdade.pdf

O material entregarase nas escolas infantís, nos colexios, nas xogueterías e noutros establecementos de venda de xoguetes e en centros comerciais e de lecer infantil, entre outros. Tamén se entregará nos programas municipais Aulas Abertas e Aprende Xogando, así como no Pazo de Feiras e Congresos, que acolle actualmente a feira Xuvenlugo.

Os xoguetes, ferramentas coas que aprender

“Sabemos que os xoguetes axudan á construción da identidade individual propia dos nenos e nenas e a desenvolver a súa autonomía, redundando no beneficio da poboación en xeral e, dado que eses xogos e xoguetes xeran expectativas de xénero, cremos que deben ser ferramentas coas que aprender e descubrirse como persoas iguais e non promover a asignación de roles sexistas”, afirmou Silvia Alonso.

A edil convidou á cidadanía a consultar a publicación e lembrou, alén, que un estudo recente do Instituto da Muller presentado a finais do 2020 reflexa que o 38’5% de anuncios de xoguetes amosan ás nenas replicando arquetipos femininos de beleza ou de coidadora e nai/esposa, que case no 22% dos xoguetes para nenas se emprega a cor rosa e que en aproximadamente a metade dos anuncios protagonizados por nenas, elas xogan con bonecas mentres que, nos protagonizados por nenos, o 45% xoga con figuras de acción ou vehículos, ao igual que na publicidade protagonizada por nenas o 58% dos xoguetes non teñen funcións electrónicas nin mecánicas.

“Somos conscientes de que nos últimos tempos as distintas marcas de fabricantes cambiaron nos seus catálogos e foron eliminando estereotipos sendo cada vez máis frecuentes as imaxes que amosan pequenas realizando tarefas socialmente recoñecidas como masculinas e viceversa. Andouse camiño, pero aínda queda por facer, especialmente en datas tan sinaladas coma estas nas que os xoguetes cobran un protagonismo especial polo que, dende a Administración local, convidamos á veciñanza a que nos axude a non fomentar a discriminación”, concluíu a concelleira de Muller e Igualdade, Silvia Alonso.

Multimedia

  • Muller e Igualdade fomenta neste Nadal os xogos e xoguetes non sexistas coa difusión da guía Xogamos pola Igualdade

Noticias relacionadas