O executivo de Lara Méndez, a través da Concellería de Muller e Igualdade, que dirixe Silvia Alonso, deseñou unha actividade para celebrar o Día Internacional da Muller e a Nena na Ciencia, que se conmemora cada ano o 11 de febreiro. Esta será a primeira actividade ao redor de diversas datas significativas dentro do calendario feminista que a Concellería prevé celebrar ao longo do ano e que dará a coñecer nos vindeiros días.

"O Día da Muller e da Nena na Ciencia celebrarase cunha Escape Room que montaremos para a ocasión e que se manterá ao longo da semana do 7 ao 12 de febreiro na Casa da Xuventude", tal e como subliñou a Concelleira, quen se puxo en contacto cos distintos centros educativos do municipio para convidalos a asistir a esta actividade, onde o alumnado participante terá a ocasión de descubrir ou recordar que mulleres e nenas desempeñan un papel fundamental na comunidade científica e que a súa presenza debe fortalecerse.

Haberá dúas sesións todos os días en xornada de mañá, reservadas para o alumnado de 5º e 6º de primaria e 1º e 2º de ESO dos centros educativos do municipio , ás 11:00 e ás 12:30 horas, e outras dúas en xornada de tarde, ás 18:00 e ás 20:00 horas, dirixidas a público familiar e xeral. O sábado todas as sesións están abertas a este público. A reserva farase por rigorosa orde de inscrición no enderezo electrónico igualdade@lugo.gal e os grupos poderán ser dun máximo de 10 persoas por sesión.

"Trátase dun tipo de actividade moi ben acollida polo público mozo que mestura matices lúdicos e educativos para que as nosas rapazas e rapaces comproben que existen referentes importantes de mulleres na ciencia, tanto as esquecidas no pasado como as moi presentes no ámbito científico e académico hoxe en día", concluíu  Silvia Alonso.

Audio

• A concelleira de Muller e Igualdade, Silvia Alonso, sobre o Scape Room | Descargar mp3