As persoas interesadas en participar neste evento, co que colabora o Concello, poden inscribirse ata o día 20 no horario de apertura de Decathlon
O Concello ten previsto un plan de tráfico cos efectos de garantir a seguridade dos e das asistentes a esta cita deportiva
- Tema
A cidade acollerá este domingo un percorrido ciclista para celebrar o Día da Bicicleta, que nesta edición cumpre 25 anos pedaleando por Lugo. O Concello colabora con esta cita deportiva, cuxo obxectivo principal é concienciar á cidadanía sobre o uso deste medio de transporte sostible e responsable co medio ambiente. Esta actividade, que reúne en cada edición máis dun milleiro de participantes, está aberta a persoas de todas as idades.
Para participar, as e os interesados poden inscribirse nas instalacións de Decathlon Lugo, colaborador da proba, ata o sábado, 20 de outubro. A entidade local lembra que é obrigatorio o uso do casco.
As persoas participantes concentraranse fronte á Casa do Concello ás 11:45 horas e a saída está prevista ás 12:00 horas, realizando o seguinte percorrido, duns 6,5 quilómetros:
- Saída: Praza Maior, cara o Círculo das Artes
- Ronda da Muralla
- Rúa Vilalba
- Rodríguez Mourelo (ida)
- Doutor Portela (ida)
- Doutor Portela (volta)
- Rodríguez Mourelo (volta)
- Ramón Ferreiro (ida)
- Volta á altura de Pintor Corredoira
- Ramón Ferreiro (volta)
- Anxo López Pérez
- Ronda Muralla (unha volta completa)
- Rúa Vilalba (2º paso)
- Anxo López Pérez (2º paso)
- Ronda Muralla (2º paso ata rúa Montevideo)
- Desvío en dirección ao casco histórico á rúa Montevideo
- Quiroga Ballesteros
- Santo Domingo
- Rúa da Raíña
- Fin en Praza Maior
Plan de tráfico
O Concello ten previsto un plan de tráfico para os efectos de garantir a seguridade dos participantes neste evento. Contarase coa presenza dun vehículo policial na cabeza, acoutando o inicio da proba e outro pechando o grupo, que determinará o fin do espazo utilizado para a marcha, mantendo a unidade do grupo.
O itinerario estará controlado por efectivos da Policía Local e Protección Civil nos puntos onde exista risco para a seguridade viaria dispoñendo de sinalización circunstancial.
A Sala de Control de Tráfico contará cun operador de servizo desde as 11:30 horas para dispoñer os semáforos da Rolda da Muralla e da Avenida da Coruña, segundo conveña en cada momento, durante o desenvolvemento da marcha.