- Tema
O Arde Lucus MMIX dará comezo oficialmente mañá venres coa inauguración do Macellum -mercado- e do campamento dos forxadores ás cinco da tarde. Comezarán así os tres días de festa nos que se recreará o pasado romano da cidade de Lugo.
Máis de 250 actividades, actuacións e espectáculos conforman esta nova edición da festa Arde Lucus, que se celebrará desde o venres á tarde ata o domingo á noite e que está organizada pola Concellería de Xuventude que dirixe Rosana Rielo.
O campamento romano abrirá un ano máis as súas portas, tamén a tarde do venres, ás cinco e media, no carril dás Estantigas.
Algunha das novidades deste ano será a clase de oratoria nas escaleiras da praza de Santa María, o espectáculo de maxia Abracadabrix, ou o circo romano nocturno que terá lugar na explanada do pavillón municipal ás 23.30 horas.
Ao longo de toda a tarde haberá un sinfín de actividades que farán revivir o pasado romano da cidade, levando a lucenses e visitantes séculos atrás ata o que era a antiga Lucus Augusti.
A gran batalla final entre celtas e romanos terá lugar ás 20:00 horas na zona peonil da Rolda da Muralla.
Ás oito e media comezarán as representacións, como o Nasciturus a cargo de Ilusión Arte no Carril das Estantigas. Esta mesma agrupación celebrará as tradicionais vodas celtas neste mesmo emprazamento ás 23:00 horas.
A outra gran cita da noite será a bacanal, que estará a cargo, como é tradicional, da asociación Alas, e que se celebrará a partir da unha da noite na praza de Santa María. E á 01:30 Hipócrita Teatro representará a obra de teatro Tles (A vida de Suso Piloño), unha obra recomendada para maiores de idade.
Durante a noite, a cidade contará con animación continuada de rúa, coa presenza de zancudos, desfiles, gardas romanas, tambores, etc...
Resto do programa
No programa xeral do Arde Lucus MMVII mantéñense as actividades estrela doutras edicións, como o pregón, o nomeamento dos personaxes da festa, a queima da muralla que este ano contará cunha banda sonora propia do Arde Lucus, a venda de escravos, o concerto de arpas ou a exhibición de bigas e cuádrigas.
O sábado pola tarde, ás 19:45 horas haberá outra sesión do Circo Romano que tradicionalmente congrega a un bo número de persoas.
O domingo a cidade continuará vivindo a festa. Seguirán abertos os campamentos romanos, o mercado, haberá máis actividades deportivas e paseos de bigas pola cidade.
O centro histórico contará coa actuación dos percusionistas de Braga e con outros grupos de animación de rúa, así como de instrución militar.
A colocación da Sentinela no tramo peonil da Ronda da Muralla e a representación de As troianas, porá fin aos tres días de festa romana que xa se atopa no sétimo posto da páxina web www.7mejores.es na que se elixe a mellor festa de toda España.
