Ante as previsións meteorolóxicas que advirten nas próximas horas dunha alerta amarela por precipitacións en forma de neve con acumulacións de ata 4 centímetros nunha cota inferior a 300-500 metros, o Executivo de Lara Méndez vén de poñer en marcha un dispositivo especial para garantir a seguridade peonil e de vehículos en todo o municipio.

Deste xeito, tanto a concellería de Medio Ambiente, que dirixe Miguel Fernández, como os servizos de Policía Local, Bombeiros e Protección Civil se manteñen vixiantes para atender calquera incidencia que poida xurdir. Así, a Administración local dispón do acopio de 5 toneladas de sal e de diversos medios mecánicos entre os que se atopan cinco esparexedoras, unha sobre camión para botala na calzada e catro carriños para beirarrúas e de tres coitelas quitaneves, novamente unha sobre camión para calzadas e as outras dúas sobre varredoras, así como de dous tractores con pa.

Dende o Goberno local faise un chamamento á cidadanía, recomendándolle extremar as precaucións en todo tipo de desprazamentos e pide que se eviten correr riscos innecesarios para non incorrer en situacións de perigo.

Audio

• O concelleiro de Medio Ambiente, Miguel Fernández, sobre o dispositivo especial, por mor do temporal | Descargar mp3