Maite Ferreiro asiste ao inicio do XX Concurso de Tapas de Lugo celebrado no restaurante Paprica.
Maite Ferreiro: "O Concurso de Tapas é o certame culinario máis importante de Lugo".
As veciñas e veciños de Lugo poderán degustar e puntuar as tapas ata o vindeiro 23 de novembro.
A concelleira de Cultura, Turismo e Promoción da Lingua, Maite Ferreiro, asistiu ao acto de inicio do XX Concurso de Tapas de Lugo, celebrado hoxe no Restaurante Paprica. No acto estivo presente tamén o presidente da Asociación Provincial de Empresarios da Hostalería e Turismo de Lugo (APEHL), Cheché Real. Ferreiro destacou que este ano participarán "máis de 40 establecementos de hostalería de Lugo", e afirmou que o Concurso de Tapas é "o certame gastronómico máis importante da cidade". A concelleira de Turismo convidou ás veciñas e veciños de Lugo "e a todas as persoas que se acheguen a probar e puntuar as distintas tapas do concurso ata o vindeiro día 23"
Maite Ferreiro destacou "a importancia do concurso de Tapas para a cidade e para a nosa promoción turística como destino sostible, así como para a hostalería local". Pola súa banda, Cheché Real destacou "o compromiso da área de Turismo co sector da hostalería na realización deste concurso"
Entre o 7 e o 23 de novembro os locais participantes ofertarán as súas tapas a todas as persoas que o desexen, que exercerán de xurado popular para escoller a tapa gañadora do concurso e as finalistas, que serán avaliadas posteriormente por un xurado profesional.
As persoas que o desexen, poderán votar as distintas tapas mediante un cupón de votación individual, que deberá ir selado polos establecementos participantes. Cada tapa poderá ser puntuada cunha nota do 1 ao 5. Todos os cupóns presentados participarán no sorteo de distintos premios e, segundo o número de establecementos que se puntúen, as veciñas e veciños participantes poderán gañar distintos premios.
Os locais participantes nesta edición son: 3 Pés, A Laxa, Anda, Antas, Ave César, Bulló Xantar, Casa d’Auga Vinoteca, Casa María, Castor, Coco’s Bar, Colmado 176y9 – Pazo de Orbán, De Vega, Desnivel, Eduri, El Boni, El Dotmas Bar, Fonte do Rei 2, Glam Taoo, Gran Café – Eurostars Gran Hotel Lugo, La Cosechera de 1977, La Escalera, La Pepita Lugo, La Terraza del Méndez, Las Cinco Vigas, Malizzia Street Food, Mercure Lugo Centro – Brasas Brancas, Mesón El Castillo, Cincuenta e Seis, Figón, Galo, Mercado, Orixe do Campo, Paprica, Pasarela, Prebe, Pub Karrusel, Pulpería O Castelo, San Marcos, The Real Coffee, Toni Portela e Tosar by Boni.
