O Tenente de Alcalde e concelleiro de Mobilidade e Infraestruturas, Rubén Arroxo, visitou xunto co edil de Infraestruturas Urbanas, Alexandre Penas os traballos de peonalización que se están realizando no barrio de Recatelo. Arroxo afirmou que “queremos mellorar a imaxe deste barrio histórico da cidade, situado entre a Muralla e o Parque de Rosalía”, e destacou que “Recatelo pode ser unha importante zona de paseo ao mesmo tempo que se melloran os servizos e a calidade de vida da veciñanza”.

No día de hoxe inicìáronse os traballos de humanización da rúa Vila de Sarria, que se realizarán durante as vindeiras 3 semanas. Rubén Arroxo afirmou que “as vindeiras fases do plan inclúen a peonalización das rúas Avelino Pousa Antelo e Isaac Díaz Pardo para completar a humanización do barrio”. “Actualmente estase a realizar o proxecto para estas dúas rúas, e agardamos que os traballos se inicien durante o 2021”, declarou o Tenente de Alcalde.

“Desde o goberno municipal seguimos traballando nunha cidade na que os peóns sexan o centro da mobilidade”, afirmou Rubén Arroxo, que destacou as diversas medidas postas en marcha para este fin “como a realización de pasos de peóns elevados ou as distintas peonalizacións que se están a levar a cabo e a proxectar”.

Barrio da Milagrosa

Rubén Arroxo anunciou a entrada en funcionamento dunha ampliación do novo plan de tráfico do Barrio da Milagrosa. “A rúa Otero Pedrayo, no treito que enlaza a Avenida da Coruña con Ramiro Rueda pasa a ser de sentido único para reducir a perigosidade deste cruce”. Coa nova modificación, este treito de Ramiro Rueda pasa a ser de sentido ascendente, circulando o tráfico cara a Avenida da Coruña.

Audio

• O concelleiro de Mobilidade e Infraestruturas, Rubén Arroxo, sobre a peonalización da Vila de Sarria | Descargar mp3