Arroxo: "melloramos a fluidez do tráfico e permitirá avanzar na eliminación de semáforos, aumentando a seguridade do tráfico e mellorando a mobilidade en Lugo".
O Tenente Alcalde e o edil de Infraestruturas, Alexandre Penas, visitaron a zona "no primeiro día sen regulación por semáforos".
Rubén Arroxo, Tenente de Alcalde do Concello de Lugo e edil responsable da área de Mobilidade, acompañado por Alexandre Penas, responsable de Infraestruturas Urbanas, visitaron a intersección entre Afonso X O Sabio e a Rolda de Fingoi, onde comezou a funcionar a nova rotonda despois de apagar os semáforos que regulaban este cruce ata agora. Arroxo afirmou que a construcción desta rotonda permite eliminar os semáforos "mellorando a fluidez do tráfico e a seguridade na zona".
A intersección da rúa Alfonso X coa Rolda de Fingoi pasou de ser un cruce regulado por semáforos cunha contorna espida que producía un importante contraste visual coa Ronda de Fingoi a un espazo cunha mellor integración tanto funcional como estética que mellorou a integración na contorna, a seguridade da intersección viaria e reduciu os tempos de espera.
Con esta actuación, o Goberno de Lugo busca eliminar os semáforos creando unha rotonda axardinada, e redeseñando as entradas para garantir a seguridade dos peóns e manter a continuidade da rúa. Adaptouse o alumeado ó novo deseño, avanzando na implantación de alumeado LED e modificarase a rede de saneamento para garantir a correcta drenaxe da intersección.
Audio
- Rubén Arroxo, Tenente de Alcalde do Concello de Lugo, sobre a rotonda Afonso X | Descargar mp3
