A concelleira de Cultura, Turismo e Promoción da Lingua, Maite Ferreiro, presentou xunto co presidente do Grupo Fotocinematográfico Fonmiñá, Xulio Xiz, e a deputada de Cultura, Iria Castro, a 47 edición da Semana Internacional de Cine de Lugo. A cita, que se vén celebrando anualmente dende o 1979, terá lugar entre o 22 e o 27 de setembro de 2025. No acto estiveron tamén presentes Manuel Curiel, director da Semana de Cine, representantes da Xunta de Galiza e da USC, e integrantes do Comité Organizador da Semana.

"Debemos apoiar dende as institucións a nosa cultura propia, neste caso a produción de cine en galego", dixo Maite Ferreiro, que engadiu "as experiencias que temos dinnos que temos contadoras e contadores de historias moi boas, que fan obras fermosas e interesantes, que redundan na defensa e promoción da nosa lingua e da nosa cultura, que é o faro que nunca debemos perder de vista". A concelleira de Cultura afirmou que "as e os afeccionados ao cinema esperamos cada ano a setembro coa ilusión de ver un novo programa da Semana de Cine e desfrutar dos centos de películas e curtas que o Grupo Fotocinematográfico Fonmiñá pon á nosa disposición".

Iria Castro afirmou que "a semana de cine é unha cita consolidada no calendario cultural ao finalizar o verán", e destacou que esta cita "permítenos desfrutar de filmes que non chegan ás salas comerciais, pero que contan cunha gran calidade artística".

Ferreiro destacou o traballo do Grupo Fotocinematográfico Fonmiñá, "que leva preto de 50 anos dando visibilidade ao cine entre a veciñanza de Lugo", e engadiu "a Semana de Cine de Lugo é unha das actividades máis relevantes do calendario cultural da cidade".

Audios

• A concelleira de Cultura, Turismo e Promoción da Lingua, Maite Ferreiro, sobre a Semana de Cine | Descargar mp3
• A deputada de Cultura, Iria Castro, sobre a Semana de Cine | Descargar mp3