O Executivo de Paula Alvarellos abre unha consulta pública para incorporar achegas cidadás á futura ordenanza que regulará a Zona de Baixas Emisións. Deste xeito, o Goberno local continúa avanzando na elaboración da ordenanza da futura ZBE coutada dentro do Centro histórico. Así, e  cumprindo coa normativa vixente, o Concello de Lugo articula este proceso participativo que ten por obxectivo recompilar achegas da veciñanza para que posteriormente os técnicos que traballan na confección do documento poidan avaliar a súa idoneidade para incorporalas ao texto final.
 
A cidadanía pode facer chegar as súas opinións a partir do luns e por un prazo de 15 días hábiles indicando o seu nome e apelidos ou denominación social, mediante correo electrónico dirixido a ordenanzazbe@lugo.gal. Poderán participar nesta fase de consulta pública,  aqueles cidadáns e cidadás, empresas, organizacións e asociacións que consideren que resultan parte interesa pola futura norma.
 
As Zonas de Baixas Emisións son áreas urbanas co acceso, a circulación e o estacionamento dos vehículos regulado. O propósito principal das ZBE, obedece ao imperativo ao que obriga a Lei de Transición Enerxética para os concellos de máis de 50.000 habitantes e que vén definida pola lexislación europea. O seu obxectivo é mellorar a calidade do aire nas áreas urbanas, reducindo o consumo de combustibles fósiles e mitigar os efectos do cambio climático.