O concelleiro de Desenvolvemento Local e Emprego, Mauricio Repetto, participou esta mañá na presentación da iniciativa Supermartes na Raíña, organizada polos establecementos desta céntrica rúa lucense, en colaboración co Concello e a Asociación Lugo Monumental.

Ao longo de cinco xornadas, os locais da Rúa da Raíña colocarán stands cos seus produtos na rúa e ofrecerán descontos e promocións aos clientes, co obxectivo de dinamizar a actividade nunha das principais rúas comerciais da cidade. Deste xeito, a iniciativa levarase a cabo todos os martes, do 20 de outubro ao 17 de novembro.

Mauricio Repetto subliñou que “dende o Concello de Lugo estamos moi satisfeitos de colaborar con iniciativas deste tipo que contribúen a fomentar o comercio de proximidade e dinamizar a actividade nas nosas rúas e barrios, nun momento de especial dificultade para os comerciantes e pemes polas consecuencias da pandemia”.

Así mesmo, a rexedora convidou á cidadanía a mercar nos establecementos participantes, “sempre mantendo as distancias de seguridade e o resto de indicacións establecidas polas autoridades sanitarias para facer frónte á Covid”.

No acto de presentación participaron tamén empresarios e comerciantes da rúa da Raíña, así como o presidente de Lugo Monumental, Luis Latorre. Os establecementos colaboradores son: Cafetería Reina; O Baúl Branco; Perfumerías Avenida; Óptica Lentes e Parfois.