O alcalde de Lugo, Miguel Fernández, recibiu este martes na Casa do Concello ao representante institucional de Renfe en Galicia, Javier Pérez López, nun encontro de traballo que dá continuidade á xuntanza celebrada a pasada semana en Madrid co presidente da operadora, Álvaro Fernández de Heredia.

Durante a reunión, Miguel Fernández trasladou de novo as principais propostas da cidade en materia ferroviaria, facendo fincapé na necesidade de mellorar os horarios para facilitar a mobilidade diaria. Entre elas, destacou a opción de viaxar a Madrid a primeira hora da mañá e regresar a última da tarde como medida a curto prazo, xunto a outras iniciativas a medio prazo como a mellora da conexión con Ourense para acceder á alta velocidade ou o reforzo das ligazóns con Barcelona e a Cornisa Cantábrica. “Estamos a manter un contacto constante con Renfe para avanzar en melloras horarias que permitan, por exemplo, viaxar a Madrid a primeira hora e regresar a última da tarde”, afirmou o rexedor, quen tamén valorou positivamente “a vontade de diálogo e colaboración manifestada por Renfe.”

Miguel Fernández puxo en valor este traballo continuado como mostra do compromiso do Goberno local cunha mobilidade útil e adaptada ás necesidades da veciñanza. “Non se trata de buscar titulares nin de quedar ben nunha foto, senón de traballar con rigor, de forma constante e con lealdade institucional para acadar melloras reais que beneficien á cidadanía de Lugo”, subliñou.