O Goberno de Lara Méndez quere incorporar con vistas ao vindeiro Ano Santo a valorización do Camiño Primitivo ao seu paso polo municipio como elemento dinamizador das artes e do talento, do patrimonio cultural, histórico e arquitectónico, do rural e dun turismo que busca experiencias diferentes.

Con este fin, lanza os I Premios Connexio, espazos para a reflexión, cos que o Concello premiará seis proxectos de intervencións artísticas en seis igrexas situadas ao pé do itinerario xacobeo, declarado Patrimonio da Humanidade pola UNESCO. “Abriremos o vindeiro luns, día 1 de xullo, a convocatoria pública para a creación de proxectos que se exporán nestes templos, tanto no seu interior como no exterior, co obxectivo de incitar á reflexionar sobre o que representa a peregrinación, o contacto co Camiño, así como a investigación e a exploración dos vínculos entre a arquitectura litúrxica e a arte contemporánea”, comentou a rexedora, que estivo acompañada na presentación desta iniciativa do edil Mauricio Repetto e de César Carnero, delegado episcopal de Patrimonio Histórico Artístico.

“En Lugo temos todo o potencial para crecer en número de visitantes, pero queremos que o faga mantendo a esencia do modelo turístico sostible que perseguimos, aproveitando os nosos extraordinarios recursos naturais e de patrimonio histórico e cultural”, sostivo Lara Méndez.

“Buscamos darlle a Lugo unha maior dimensión e proxección cara a Europa, aproveitando que o 2021 é Ano Xacobeo e o transcurso do Camiño Primitivo polo municipio”, comentou a alcaldesa, lembrando que por esta Ruta, de enorme beleza natural, pasaron máis de 16.000 persoas de todos os puntos do continente”, comentou.

O Concello tamén convoca estes premios co obxectivo de dinamizar, asemade, o tecido artístico e empresarial lucense establecendo conexións entre os axentes culturais (empresas, creadores, artesáns, etc.) a comunidade veciñal e os peregrinos, facéndoos partícipes do proxecto.

As intervencións artísticas desenvolveranse en seis igrexas situadas no Camiño Primitivo, ao seu paso por distintas parroquias de Lugo: Santa María en Gondar; Capela do Carme; San Xóan Alto; San Vicente en Burgo; San Miguel en Bacurín; e San Pedro de Abaixo en Mera. As mesmas foron elexidas por ser as que teñen máis valor histórico e patrimonial.

César Carnero destacou o enorme interese deste proxecto, “pouco común e que compaxina a fusión da arte sacra e contemporánea no marco do Camiño Primitivo. A igrexa sempre tivo un importante papel no fomento da cultura e das artes, e iste proxecto enmárcase nesta idea”.

Mauricio Repetto avanzou que outorgarase un premio de 3.000 euros por cada unha das propostas de intervención artística, dotación que será abonada en dous prazos e irá destinada a cubrir os gastos de desenvolvemento, produción e execución (montaxe) da obra resultante da proposta premiada. Os artistas realizarán as súas intervencións dos espazos, que serán documentados tanto fotograficamente como en vídeo, durante o mes de setembro.

Así mesmo, apuntou que “queremos que os proxectos perduren no tempo e poidan supoñer un incentivo visitar estes templos, que forman parte da gran riqueza patrimonial coa que contamos, espertando o interese de veciños e visitantes. Neste senso, vanse a documentar e publicar imaxes e vídeos con información das intervencións durante a realización das mesmas, pero tamén se contará coa tecnoloxía QR. Así, na entrada de cada templo haberá un código a través do que se poderá acceder a unha visita guiada, da man dun guía experto en arte sacra, abrindo así as portas a peregrinos, veciños e interesados”.

Cómpre sinalar que tamén se van a utilizar os códigos QR para mostrar as seis intervencións artísticas unha vez finalizadas, da voz dos propios creadores,  dando así a posibilidade de ver o traballo realizado desde calquera dispositivo móbil.

O Concello e o Obispado esperan que se aninem moitos artistas a participar, “tendo en conta que para eles poder ser tamén unha forma de proxectarse a nivel internacional”,  incidiu a alcaldesa.

A presentación dos candidatos e propostas realizarase telematicamente a través da web www.connexio.gal, onde se poderá atopar toda a información, os prazos e documentos necesarios para participar nesta primeira edición dos premios. A preinscrición dos candidatos permanecerá aberta dende o día 1 ata o 12 de xullo.

A valoración das solicitudes e a proposta de concesión efectuarase por un comité de expertos composto por comisarios, xestores culturais, persoal da Diocese de Lugo e como secretario do xurado, con voz pero sen voto, un técnico do Concello de Lugo. A concesión destes premios efectuarase fomentando a concorrencia competitiva, de acordo cos principios de obxectividade, transparencia e igualdade. Todas as propostas deberán ser especialmente respectuosas co patrimonio arquitectónico, a contorna e o medio ambiente.

Audio

• A alcaldesa de Lugo, Lara Méndez, sobre a presentación dos "Premios Connexio" | Descargar mp3
• O concelleiro de Desenvolvemento local e Emprego, Mauricio Repetto, sobre a presentación dos "Premios Connexio" | Descargar mp3
• O delegado episcopal, César Carnero, sobre a presentación dos "Premios Connexio" | Descargar mp3