Lara Méndez acompaña aos Bombeiros de Lugo na formación en prevención a máis de 600 alumnos do colexio Franciscanos

A rexedora lucense destacou a importancia desta iniciativa “para que os nenos e nenas, desde pequenos, saiban como reaccionar ante situacións de perigo”.

 
Luns, 27 de marzo de 2023
Fonte: 
Gabinete de Prensa
Lara Méndez acompaña aos Bombeiros de Lugo na formación en prevención a máis de 600 alumnos do colexio Franciscanos

A alcaldesa de Lugo, Lara Méndez, acompañou este luns aos Bombeiros de Lugo e Protección Civil na súa visita ao colexio Franciscanos, onde compartiron formación e consellos prácticos con preto de 600 alumnos do centro.

Un equipo formado por oito membros do Servizo de Extinción de Incendios e Salvamento do municipio realizou unha exhibición das tarefas cotiás do Corpo e impartiu dúas charlas, unha destinada aos nenos e nenas de infantil e primaria e outra aos rapaces e rapazas de secundaria, nas que lles achegaron conceptos e consellos útiles para a prevención de lumes, ao tempo que realizaron demostracións prácticas de como actuar en casos de emerxencia, por exemplo, no ámbito doméstico.

A rexedora lucense destacou a importancia desta iniciativa “para que os nenos e nenas, desde pequenos, saiban como reaccionar ante situacións de perigo”, polo que agradeceu tanto á dirección do centro como ao Corpo de bombeiros a organización da xornada que se estendeu ao longo de todo o día.

Ao finalizar a formación, os bombeiros lucenses entregaron ás e aos estudantes un diploma e un caderno con instrucións básicas sobre como actuar en caso de emerxencia.

Multimedia

  • Lara Méndez acompaña aos Bombeiros de Lugo na formación en prevención a máis de 600 alumnos do colexio Franciscanos

Noticias relacionadas