Unhas xornadas gastrocientíficas afondan en Lugo na interacción entre ciencia e cociña

30 persoas participan no IES Sanxillao nun foro gatrocientífico que ofrece a posibilidade de degustar o mércores menús cociñados polo chef Javier Cabrera

Luns, 29 de febreiro de 2016
Fonte: 
Gabinete de Prensa
Unhas xornadas gastrocientíficas afondan en Lugo na interacción entre ciencia e cociña

O descubrimento e a análise das bases científicas sobre as que se asentan os procesos comúns da cociña, as aplicacións científicas, innovacións en gastronomía e outros aspectos físicos, químicos e nutricionais a ter en conta na gastronomía conforman o compendio de obxectivos que perseguen as xornadas Ciencia aplicada á cociña e á industria alimentaria, que botaron a andar este luns con 30 participantes no IES Sanxillao da capital luguesa, onde se desenvolverán a distintas sesións programadas ata o venres 4 de marzo.

A Concelleira de Cultura, Turismo, Xuventude e Promoción da Lingua, Carmen Basadre; a directora do programa formativo, a catedrática da área de Tecnoloxía dos Alimentos da USC, Ángeles Romero; o vicerreitor de Coordinación do campus de Lugo, Javier Bueno; a xerente de Tastelab, Maruxa García; a deputada provincial, Pilar García Porto; e a directora do IES Sanxillao, María Ángela Gómez, participaron na inauguración dun foro gastrocientífico que tamén ofrece á cidadanía luguesa a posibilidade de participar na degustación dos menús que elaborará o mércores o chef Javier Cabrera.

As persoas interesadas en degustar o mércores os distintos pratos elaborados polo chef de Els Brancs poden formalizar a súa inscrición e adquisición da correspondente invitación a través do número de teléfono 673 380 688.

A sesión de apertura deste foro gastrocientífico afondou nas múltiples ligazóns existentes entre a ciencia dos alimentos e a gastronomía ao longo de distintas actividades guiadas por Francisco Galisteo González, profesor de Física Aplicada da Universidade de Granada. Un relatorio sobre a recuperación para a gastronomía dun marisco esquecido como é o caso da lapa, a cargo da profesora do CIFP Carlos Oroza, Maruxa García; unha intervención do responsable de I+D da empresa Innolact, Sergio Martínez, que expuxo casos de aplicación práctica de conceptos gastronómicos á industria alimentaria, e un showcooking guiado polo chef Héctor López, do restaurante España, completaron o programa da primeira xornada de do foro.

A alimentación saudable, a percepción sensorial dos alimentos e a integración de aspectos de pracer e saúde no sector alimentario, a partir do caso práctico da castaña, centrarán a temática das sesións programadas para este martes, nas que intervirán como relatores a profesora da USC Lourdes Vázquez, Maruxa García, de Tastelab, e Rubén Ríos, de Castañam.

O chef Estrella Michelín Javier Cabrera será protagonista o mércores coa elaboración de menús degustación. Cabrera tamén participará o xoves nestas xornadas, nas que, xunto con Juan Carlos Arboleya, dará a súa opinión sobre se a cociña debe entenderse como unha actividade científica ou artística. A relación da literatura coa gastronomía en Galicia capitalizará a intervención do xornalista Miguel Vila. As xornadas rematarán o 4 de marzo cunha sesión guiada por David López Rubiño sobre creatividade na gastronomía e diálogos gastrocientíficos.

Máis información na web www.cienciaycocina.com.

Multimedia

Noticias relacionadas