O Concello de Lugo celebrou hoxe, consonte os prazos establecidos polo calendario electoral, a sesión plenaria extraordinaria na que se efectuou o sorteo das persoas que formarán as mesas electorais nos comicios municipais do 24 de maio.
- Tema
No sorteo, celebrado por ordenador, foron elixidas as 1.116 persoas necesarias para constituír, ben como titulares ou ben como suplentes, as 124 mesas electorais nas que poderán depositar o voto os veciños e as veciñas do concello de Lugo. O censo electoral para estes comicios é de 79.331 persoas e para cada unha das mesas foron elixidos 3 titulares (un presidente e dous vogais) e 6 suplentes (dous para cada uno dos membros da mesa).
Unha das novidades que se producirán nestas eleccións locais é a modificación na localización dalgunhas das mesas electorais no noso termo municipal, que se producen para facilitar todo o posible o exercicio do dereito ó voto das persoas censadas en Lugo.
O Concello, a petición da Comisión de Alcaldía e Participación cidadá, realizou un estudo da localización das mesas e colexios electorais, co obxectivo de analizar a súa situación xeográfica con relación ó domicilio dos electores.
A finalidade desta modificación foi que, no posible e sempre dentro das limitacións legais establecidas, o emprazamento dos colexios electorais resulte o máis próxima posible para o groso do electorado da sección censual.
Logo dos informes técnicos oportunos, modificouse a localización das Mesas electorais das Seccións: 5/2, 5/3, 5/13, 5/14, 5/16 e 5/19. As zonas afectadas por estes cambios son, en liñas xerais, as rúas Lamas de Prado, Ourense, Tui, Barrio de Marcelle, Rosende e Mar Cantábrico, así como as zonas do antigo Hospital Xeral, da fábrica de Abella e do Castiñeiro.
Para informar ós electores e electoras afectados por estes cambios, o Concello enviou preto de 8.000 cartas informativas a outras tantas persoas inscritas no censo electoral nas devanditas zonas.