A Xunta de Goberno aprobou este mércores o inicio do procedemento para contratar o servizo de atención ao público, e a coordinación e desenvolvemento de actividades nas casas da Xuventude e da Música por un importe anual de 76.000 euros. Segundo informou o voceiro municipal, Miguel Fernández, o contrato, cunha duración de dous anos, máis outros dous de prórroga como máximo, ten como obxectivo mellorar a participación efectiva dos mozos e mozas na sociedade mediante unha integración educativa, social e laboral, ofrecéndolles alternativas lúdicas e formativas.

Por outra banda, a Xunta de Goberno aprobou catro licenzas para mellorar a accesibilidade coa instalación de ascensores noutros tantos edificios de vivendas, situados nas rúas Serra de Ancares, Río Narla e Montirón e na Ronda das Mercedes.