O Concelleiro de Educación e Infraestruturas Urbanas, Manuel Núñez, deu conta este xoves do novo contrato do servizo de cociña, comedor e lavandería nas escolas infantís municipais Serra de Outes e Gregorio Sanz, así como dos cambios que se realizaron nos pregos de condicións, seguindo o establecido nos informes técnicos, para proceder á adxudicación destes servizos e garantir a cobertura desta prestación.

Deste xeito, as novas cantidades de adxudicación para o exercicio 2016 ascenden a 53.953,22 euros para a Escola Infantil Municipal Serra de Outes e a 49.258,16 euros no caso da Escola Infantil Gregorio Sanz.

No baremo de adxudicación, os criterios de valoración establecidos fíxanse con sete puntos para a oferta económica. O favorecemento da formación do persoal terase en conta con ata un punto, valorando materias como a seguridade alimentaria ou a nutrición e alimentación. As melloras nas condicións do persoal contratado tamén puntuará con ata dous puntos, tanto as salariais como as laborais, unha medida anunciada pola rexedora este mesmo mes.

Tal e como avanzou Manuel Núñez, a entidade local estima o gasto en alimentación en 11.629,13 euros para cada unha das escolas, sen posibilidade de minorar o prezo na oferta que presenten as empresas.

Audio

• Manuel Núñez, sobre a licitación dos servizos de cociña, comedor e lavandería de 2 escolas infantís | Descargar mp3