A área de Benestar Social, da que é responsable a edil Olga López Racamonde, organiza un curso de alfabetización dixital dirixido a persoas maiores de 65 anos que teñan interese pola aprendizaxe do funcionamento das novas tecnoloxías e outro para adquirir competencias na tramitación básica coa administración electrónica, neste caso, destinado a persoas usuarias dos Servizos Sociais que xa teñan coñecementos básicos no manexo do ordenador.

A formación desenvolverase na Aula Cemit María Balteira e no Edificio de Novas Tecnoloxías, onde se habilitarán 9 prazas por curso e centro coa posibilidade de facelo tanto en quenda de mañá como de tarde.

Para o de alfabetización dixital realizaranse, en total, catro convocatorias, en períodos de 10 días, a razón dunha hora por xornada. As persoas interesadas en participar nel deberán indicar na solicitude cales son as súas preferencias de localización e horario.

Segundo indicou a concelleira, dende o servizo priorizarase a situación de vulnerabilidade das e dos usuarios, en canto aos recursos económicos dos que dispoñen pero tamén se terán en conta outros factores como o nivel de soidade ou o descoñecemento do uso das TIC, etc…

A inscrición poderá realizarse, do 6 ao 9 de outubro, ben a través dos números de teléfono 646706344./ 689307601 en horario de 9:00 a 14:00; ben do correo electrónico   animacion.sociocultural@lugo.gal ou benpresencialmente, solicitando cita previa nos centros sociais Maruja Mallo ou Milagrosa.

Por outra banda, serán as e os profesionais municipais os que deriven dos seus servizos, segundo criterios técnicos, aos asistentes ao curso encamiñado a adquirir competencias no manexo da e-administración, que terá unha duración de tres semanas a razón de hora e media diaria.

Dentro dos protocolos COVID e medidas de protección que serán de aplicación, ao inicio da actividade pasaráse a cada participante unha enquisa para autoavaliar síntomas e contactos con outras persoas, co fin de garantir aulas o máis seguras posible.

Achéganse, con maior detalle, os horarios de cada convocatoria.

CURSO ALFABETIZACIÓN INFORMÁTICA PARA MAIORES DE 65 ANOS

CURSO TRÁMITES BÁSICOS COA ADMINISTRACIÓN ELECTRÓNICA

Toda esta información, xunto ás bases e anexos, pode consultarse no seguinte enlace : http://concellodelugo.gal/gl/tramites/bases-e-inscricions-cursos-de-informatica que se atopa aloxado na web municipal www.concellodelugo.gal.