A alcaldesa de Lugo, Paula Alvarellos, participou este luns en Viana do Castelo na cerimonia de apertura da Capital da Cultura do Eixo Atlántico 2025, que acolle esta cidade portuguesa tomando o relevo da capital lucense. A rexedora desexou “moitos éxitos” na programación desta iniciativa ao presidente do Eixo Atlántico e alcalde de Viana do Castelo, Luis Nobre.

“Este proxecto non só fortalece os lazos entre as nosas cidades, senón que tamén nos permite compartir e celebrar a nosa riqueza cultural co mundo. En 2023, tivemos a honra de acoller a Capital da Cultura en Lugo e o resultado foi sobresaínte: máis de 15.000 persoas participaron na programación que deseñamos, o que demostra o impacto positivo que este tipo de iniciativas teñen nas nosas comunidades”, apuntou Alvarellos.

A inauguración, que tivo lugar no centro cultural do municipio luso, ofreceu un espectáculo multidisciplinar creado e dirixido polo talentoso artista portugués Daniel Pereira Cristo: “Mar Adentro”, unha proposta escénica, que mesturou danza, voz e música, e contou coa participación especial de Xabier Díaz. O concerto contou coa dirección artística e musical de Hélder Costa. Así mesmo, durante a tarde tamén se inaugurou a exposición “Historia do Eixo Atlántico”, no Passeio das Mordomas da Romaria, que destaca os fitos máis importantes da asociación nos seus 33 anos de historia.

A Capital da Cultura do Eixo Atlántico é un título bienal que se outorga a unha cidade membro do Eixo Atlántico, unha rede de cooperación transfronteiriza que agrupa municipios do norte de Portugal e Galicia. Este título busca promover a cultura, o turismo e a identidade común da Eurorrexión Galicia-Norte de Portugal.

En 2023, a cidade de Lugo foi designada como a Capital da Cultura do Eixo Atlántico, ofrecendo unha ampla programación cultural con máis de 30 programas e máis dun cento de actividades relacionadas con diversas disciplinas culturais e artísticas.