A Fundación TIC da Deputación, a través do InLugo, impartirá 64 cursos e obradoiros gratuítos no 4º trimestre de 2017, 21 máis que na anterior tempada. O Presidente da TIC e da Deputación, Darío Campos, presentou este luns o programa de actividades de novas tecnoloxías destinadas aos lucenses de máis de 55 anos, que suman un total de 877 prazas, o dobre que no trimestre anterior. Arrancará este mércores, 13 de setembro.

Darío Campos, que estivo acompañado pola Alcaldesa de Lugo, Lara Méndez, dixo que “neste trimestre imos reforzar o labor social que está a desenvolver a TIC cun sensible incremento no número de cursos e prazas. Queremos atender así a alta demanda que temos e achegar ao maior número posible de maiores os beneficios que ten o uso das novas tecnoloxías na súa vida cotiá, nas súas relacións sociais, na súa saúde e na súa autonomía persoal”.

Segundo o máximo responsable da TIC “os lucenses de máis de 55 anos que xa pasaron por estes cursos son o mellor exemplo de que as novas tecnoloxías, ademais de útiles para mellorar a súa calidade de vida, son moito máis doadas de empregar do que parece. Por iso, quero animar aos nosos maiores a que se apunten a estas actividades e venzan o medo a estar desfasados. Aquí, ademais, atoparán novos amigos e formarán parte da familia da TIC”.

Pola súa banda, Lara Méndez puxo en valor o éxito de participación destes cursos, que axudan a non excluír a unha parte importante da sociedade, os nosos maiores, "que queremos que sigan sendo proactivos, pois teñen aínda moito que darnos e ensinarnos". Así mesmo, enxalzou o gran labor social das persoas maiores, que  a día de hoxe axudan á conciliación familiar e laboral aportando incluso ingresos á unidade familiar."

Máis cursos onde hai máis demanda

Os cursos serán de diversa duración. 37 serán de dous ou tres días, mentres que os outros 27 terán unha duración dun día. Estes últimos, que se impartirán os luns pola mañá e pola tarde e os venres pola mañá, están especialmente dedicados ao reforzamento de coñecementos, e necesitarán inscrición previa para cabida a todos os demandantes e poder distribuímos nos correspondentes días.

Con respecto ás materias, Campos anunciou que “aumentaremos o número de aqueles cursos con máis demanda, os do uso do móbil e de Internet. Pasarase de dúas a tres edicións, tanto do primeiro nivel como do segundo”. Tamén destacou “os obradoiros destinados á mellora da memoria e das habilidades cognitivas e psicomotrices, como os de Xbox ou Wii, que fomentan este tipo de exercicios mentais”. Logo do éxito da anterior tempada, este trimestre haberá 8 obradoiros de memoria. Ademais, dentro da programación os maiores da provincia poderán elixir entre talleres de redes sociais, correo electrónico ou uso de whatsapp, entre outros.

Aberto o prazo de inscrición

O prazo para apuntarse ábrese este mesmo luns, 11 de setembro. Os interesados xa poden inscribirse a través de www.fundaciontic.org e www.deputacionlugo.galou chamando ao teléfono 982 225 186. “Como sempre recomendamos que os interesados se dean présa porque as prazas soen cubrirse xa o primeiro día” apuntou Darío Campos.

Audio

• Lara Méndez, sobre os cursos | Descargar mp3