Segundo os últimos datos actualizados do padrón municipal o Concello de Lugo ten  99.348 habitantes e 21.477 superan os 65 anos, o que supón o 21,6% da poboación total.

Cifras que hoxe daba a coñecer a alcaldesa, Lara Méndez, ao tempo que salientaba como dato máis relevante o feito de que “de todas esas persoas, ao redor de 5.000 viven soas”.

“É, sen dúbida, unha circunstancia preocupante que, dende a administración local se vén observando dende hai tempo e que temos moi presente para dirixir as liñas de actuación dos servizos municipais de maneira que non só estamos a priorizar a atención a este colectivo senón que tamén boa parte dos esforzos impulsados dende a institución se dirixen a fomentar as relacións sociais entre os maiores co fin de evitar así a súa exclusión, afastando o sentimento de soidade”.

A rexedora realizaba estas declaracións durante a rolda de prensa que ofrecía esta mañá para presentar, xunto a edil de Benestar e o xefe de servizo de Xeriatría do HULA, as I Xornadas de Atención Sociosanitaria para Persoas Maiores organizadas polo Concello de Lugo.

“Un relevante encontro – subliñou Lara Méndez – no que se darán cita destacados profesionais de tódolos ámbitos relacionados coa importante tarefa de coidar e velar pola saúde e a calidade de vida das persoas maiores e co que tamén queremos poñer de manifesto o noso compromiso na consecución dun futuro á vangarda das políticas públicas coa solidariedade e o benestar interxeneracional como marca de identidade” ao tempo que lembrou que Lugo está considerado “Municipio Amigable cos Maiores dende o que apostamos por accións transversais que nos permitan lograr un Concello 8 – 80 que dea cobertura a todas as necesidades da poboación comprendida nesa franxa”.

Pola súa banda, Olga López Racamonde explicou que as Xornadas terán lugar o venres 31 de xaneiro e o sábado 1 de febrero no Auditorio do Vello Cárcere.

“Organizaranse en torno a catro mesas de traballo para abordar, entre outros aspectos, a atención á soidade, os transtornos neurolóxicos, os coidados extrahospitalarios ou a dependencia”, explicou a concelleira.

López Racamonde indicou que “o obxectivo destas xornadas, pioneiras no Concello, é o de avaliar, dende múltiples perspectivas, o funcionamento actual dos mecanismos e recursos empregados neste labor na procura de melloralos e acadar unha boa coordinación dos mesmos para efectivizar os resultados, dando resposta ás necesidades e demandas que hoxe en día esixe a sociedade”.

Así, relatou que se agarda a participación de representantes non só de entidades para as que a atención aos maiores forma parte do seu quefacer cotiá como é o caso de Cruz Vermella, Adace, Aspalu ou Afalu senón tamén de profesionais dos servizos de Xantar no Fogar, os centros de día, traballadores sociais e mesmo persoal sanitario e médico de diferentes áreas así como xornalistas de medios de comunicación local que achegarán o seu punto de vista.

“Esta primeira edición concluirá cunha charla maxistral a cargo de José Antonio López Trigo, xeriatra, traballador do Concello de Málaga e ex presidente da Sociedade Española de Xeriatría e Xerontoloxía”, avanzou Olga López ao tempo que convidou a tódalas persoas que estean interesadas en asistir a apuntarse de xeito gratuíto, até o próximo día 30 de xaneiro, a través do 010 ou do número de teléfono 982.29.73.50. As prazas ocuparanse por rigurosa orde de inscrición.

Pola súa parte o xefe de servizo de Xeriatría do HULA, José Ramón Martínez, apostou por camiñar cara a valoración integral dos pacientes tendo en conta que “a maioría dos ingresos hospitalarios que atendemos superan os 90 anos polo que, antes de darlle a alta médica cómpre analizar cales son as limitacións físicas e cognitivas e o grao de dependencia no que derivan para evitar situacións de illamento ou de exclusión ao respecto das distintas prestacións sociosanitarias actuais”.

Audio

• Lara Méndez, sobre a I Xornadas de Traballo na Atención Sociosanitaria a Persoas Maiores | Descargar mp3
• Olga López Racamonde,  sobre a I Xornadas de Traballo na Atención Sociosanitaria a Persoas Maiores | Descargar mp3