A concelleira de Cultura, Turismo e Promoción da Lingua, Maite Ferreiro, presentou as actividades que conforman a nova edición da programación de animación á lectura e contacontos. “Con estas actividades pretendemos achegar ás máis pequenas e pequenos á biblioteca e ao mundo da lectura e dos contos, prestando ademais especial atención ao fomento da igualdade de xénero”, explicou Maite Ferreiro.

“Esta edición do ciclo contará de novo co MIHL como espazo principal, achegando así á veciñanza a un edificio cultural máis”, explicou a edil de Cultura, que engadiu “para asistir será preciso retirar entrada, de maneira gratuíta, no portal entradaslugo.es”. As persoas adultas que acompañen ás nenas e nenos terán que retirar entrada, mais para dar preferencia ao público infantil, só se permitirá unha acompañante por unidade familiar, cun límite de tres entradas por persoa.

O ciclo conta cun total de seis actividades, que comezarán o 23 de abril e rematará o 12 de xuño. Cada unha delas  está dirixida a unha franxa de idade.

Actividades

Mércores, 23 de abril ás 18:00 horas no MIHL

• TEATRO GHAZAFELHOS 
• “Contamos contos de lobos?”  
• Idades: a partir de 3 anos 
• Duración:50 minutos 
• Celebramos o Día do Libro con contos de lobos. Mon e Pe buscarán contos na biblioteca nos que o lobo é o protagonista e interpretaranos coa axuda dos nenos e nenas do público, fomentando a súa creatividade e expresión corporal e oral

Xoves, 8 de maio ás 18:00 horas no MIHL

• RAQUEL QUEIZÁS 
• “Cambio e conto” 
• Idades: de 1 a 4 anos 
• Duración: 35 minutos 
• Nano está moi feliz porque naceu a súa irmá máis pequena, Nona, e el vai coidar dela. Pero, ao chegar a noite, Nona non quere ir á cama. Nano ten entón unha misión, conseguir durmir a Nona sexa como sexa

Xoves, 15 de maio ás 18:00 horas no MIHL

• NAMI E O MAGO DA BOINA 
• “A maxia dos libros” 
• Idades: a partir de 7 anos 
• Duración: 55 minutos 
• Espectáculo no que Nami e O mago da Boina dan vida a diversos fragmentos dos libros de “Crónicas do Mago Errante”, fusionando a maxia cos beneficios da lectura, nunha viaxe fascinante para toda a familia

Xoves, 29 de maio ás 18:00 horas no MIHL

• ANA MEILÁN 
• “Que pasaría se o mundo quedase sen bágoas?” 
• Idades: a partir de 3 anos 
• Duración: 45 minutos 
• Un día Simón, canso de que todo o mundo lle chame chorón, decide gardar as súas bagoas debaixo da cama. Os adultos comezan a consideralo así “un home feito e dereito”, pero, se todos gardasemos as nosas bágoas, que sería dun mundo así?

Xoves, 5 de xuño ás 18:00 horas no MIHL

• DANI BLANCO 
• “Circo na biblioteca” 
• Idades: a partir de 3 anos 
• Duración: 50 minutos 
• Pensaches algunha vez que non era posible ter circo nunha biblioteca ou nun museo? 
• A compañía de Dani Blanco, con 20 anos de experiencia, vaiche traer o mellor circo de malabares con pelotas, libros, música, equilibrios e números imposibles, para gozar do mellor circo do mundo

Xoves, 12 de xuño ás 18:00 horas no MIHL

• XAROPE TULÚ 
• “Bichocas” 
• Idades: de 1 a 3 anos 
• Duración: 35 minutos 
• Espectáculo dirixido á primeira infancia onde os obxectos e a palabra nos fan viaxar a través do mundo animal. As protagonistas destas historias aprenderán nesta viaxe a importancia de seren diversas e a posibilidade de compartir coas demais os seus afectos