A alcaldesa de Lugo, Lara Méndez, inaugurou este sábado as III Xornadas de Traballo de Atención Sociosanitaria ás Persoas Maiores, organizadas polo executivo municipal a través da Área de Benestar, que dirixe a edil Olga López, coincidindo co Día Internacional das Persoas de Idade, que se celebra cada 1 de outubro. Ao longo do día, recoñecidos expertos abordaron temas clave para o envellecemento activo dun colectivo, os maiores de 65 anos, que representa o 22% da poboación de Lugo.

“Trátase dun segmento poboacional tremendamente importante da nosa sociedade, xa non só en número, senón, sobre todo, polo papel vertebrador que exercen na mesma. Á que seguen contribuíndo axudando ao benestar social dos seus familiares e entorno máis próximo, como coidadores, xeralmente, dos seus cónxuxes ou dos seus netos” subliñou a rexedora.

“Por iso, dende o Concello de Lugo, como Administración máis próxima a veciñanza, apostamos por un modelo de cidade 8 – 80 no que buscamos a protección da cidadanía de 8 anos pero tamén da máis maior, coa certeza de que son as políticas sociais, ás que destinamos máis dun 28% do orzamento municipal, as que melloran a calidade de vida dos nosos veciños e veciñas”, explicou Lara Méndez.

A rexedora subliñou que “dende o Concello poñemos á súa diposición servizos e prestacións, así como dotacións públicas respectuosas co medio ambiente e conscientes dos retos que implica o cambio climático (novo centro social Lamas de Prado, melloras de eficiencia enerxética nos centros cívicos), con edificios comunitarios (Paco Martín) e espazos de lecer (parque Novo Freire) polivalentes e que favorezan a convivencia interxeracional”.

Pola súa parte, Olga López, aproveitou este encontro para anunciar a posta en marcha, dende a Concellería de Benestar, dun galardón xornalístico “que se entregará nas vindeiras edicións destas xornadas e co que queremos recoñecer o papel dos medios de comunicación, premiando as mellores pezas nas que se de visibilidade ao colectivo de maiores e ás súas reivindicacións”.

Desenvolvemento das xornadas

Trala inauguración, José Augusto Garíca, presidente da Sociedade Española de Xeriatría e Xerontoloxía, falou sobre as oportunidades e ameazas para un envellecemento exitoso.

Nas mesas de debate posteriores participaron expertas do Servizo de Xeriatría do HULA como a xefa do Servizo, María del Rocío Malfeito; a médica especialista Beatriz Ares, a médica interna Vanessa Álvarez; e a xeriatra Laura Gamonal; así como María Zuluaga, xefa de sección do Servizo de Benestar Social do Concello de Lugo, ou Dolores Moure Rodríguez, traballadora social do HULA, entre outros.

A charla maxistral correu a cargo de Vicente Pérez Cano, director da Confederación Estatal de Maiores Activos (CONFEMAC), e José María Faílde Garrido, presidente da Sociedade Galega de Xerontoloxía e Xeriatría, foi o encargado de poñer o broche de ouro a esta edición.

Paralelamente ao desenvolvemento das charlas que integraron o programa das Xornadas, na praza Nemesio Cobreros celebraronse mesas de detección de fraxilidade cognitiva e funcional, a cargo de médicos de xeriatría do HULA. Así mesmo, ao remate da sesión celebrouse unha chocolatada popular con baile, a carón do Vello Cárcere.