Lara Méndez manterá a exención do pago das taxas das terrazas durante todo o 2021 dando resposta á petición dos hostaleiros

Ademais, o Concello eximiu do pago do canon ás cafeterías das dependencias municipais e tampouco está a cobrar o aluguer ás empresas do CEI e da Tinería

A rexedora explicou que “estas medidas teñen como principal obxectivo manter os postos de traballo e evitar o peche de negocios por mor da pandemia”

Martes, 01 de decembro de 2020
Fonte: 
Gabinete de Prensa
Lara Méndez manterá a exención do pago das taxas das terrazas durante todo o 2021 dando resposta á petición dos hostaleiros

O Concello manterá a exención do pago das taxas das terrazas durante todo o 2021. Así o avanzou a rexedora, Lara Méndez, logo de manter unha reunión co presidente da Asociación Provincial de Hostaleiros de Lugo (Apehl), Cheché Real. “Como resposta ás peticións do sector, dende o goberno municipal acordamos non liquidar as taxas das terrazas ao longo do vindeiro ano. Con esta medida buscamos apoiar á hostalería local e mitigar, na medida do posible, as consecuencias derivadas da crise sanitaria”, apuntou.

A maiores, o goberno local eximiu do pago do canon ás cafeterías das dependencias municipais, mentres non poidan reabrir as súas portas. Deste xeito, o executivo de Lara Méndez recupera unha medida que xa puxo en marcha durante o confinamento, como resposta ao peche forzoso da hostalería no municipio decretado pola Xunta de Galicia.  Esta medida afectará ás cafeterías concesionarias que prestan os seus servizos nos centros socio-culturais, centros cívicos e instalacións deportivas municipais e manterase mentres duren as restriccións á súa actividade.

Así mesmo, a alcaldesa apuntou que “tampouco estamos a cobrar o aluguer ás empresas e emprendedores instalados nos viveiros municipais do CEI Nodus e do barrio da Tinería, éste úlitmo a pé de rúa, sendo un total de 44 empresas as que desenvolven a súa actividade nestes espazos”.

Lara Méndez explicou que todas estas medidas teñen como obxectivo o mantemento das empresas e dos postos de traballo que xeran na cidade. “A nosa prioridade nestes momentos é evitar o peche de establecementos e a destrución de emprego, por mór da pandemia”, concluíu.

Apoio ao sector hostaleiro

O sector da hostalería é un dos que máis está a sufrir as consecuencias da crise sanitaria provocada pola Covid-19. Neste senso, o Concello de Lugo está a ser pioneiro na adopción de medidas para axudar a este sector que representa o 12% do PIB do municipio e o 19% do emprego.

Audio

  • A alcaldesa de Lugo, Lara Méndez, sobre as novas medidas da hostalería e viveiros municipais | Descargar mp3

Noticias relacionadas