A Alcaldesa de Lugo, Lara Méndez, participou este luns na inauguración do Coloquio Internacional In Roma Nata, Per Italiam Fusa, In Provincia Manat, A Cidade romana no nororeste: novas perspectivas, que terá lugar hoxe e mañá na Facultade de Humanidades e na Casa do Saber. Trátase dunahs xornadas que versan sobre o urbanismo, as infraestruturas e a paisaxe de dúas cidades romanas, Lucus Augusti e Bracara Augusti, dende distintas perspectivas e de xeito multidisciplinar. Ao acto tamén asistiron a Vicerreitora de Servizos Universitarios do Campus, Carme Silva, a Decana da Facultade de Humanidades, María Isabel González, a Deputada de Cultura, Pilar García, o rexedor de Braga, Ricardo Río, e dous profesores da materia de Historia Antiga da facultade, Dolores Dopico e Manuel Villanueva, respectivamente.

Na súa intervención, a rexedora puxo en valor o pasado que comparten tanto Lugo como Braga, dúas cidades conectadas a través da Vía Romana XIX, así como que ambos os dous lugares celebren con festas de recreación histórica este pasado.

Así mesmo, Lara Méndez, fixo fincapé neste pasado conxunto para verbalizar todo o que une ás dúas cidades denominadas das grandes de Galicia e Portugal, o que ademais implica un certo liderado do Eixo Atlántico. Nesta liña, tamén apelou ao traballo común para buscar o desenvolvemento de ambas as dúas cidades a través dos enlaces culturais ou deportivos. De feito, Lugo acollerá o vindeiro ano os Xogos do Eixo Atlántico, tal e como quixo lembrar Méndez.