A Concelleira de Cultura, Turismo, Xuventude e Promoción da Lingua, Carmen Basadre, a Deputada de Cultura, Deseño e Artesanía, Pilar García, e o Secretario da Sociedade Filarmónica de Lugo, José Luís Díaz, presentaron este luns, no Salón de Actos do Pazo de San Marcos, a nova programación de concertos da tempada 2017/2018 da Sociedade Filarmónica de Lugo. Trátanse das 10 actuacións que contarán con destacadas agrupacións e solistas nacionais e internacionais e que terán lugar durante os os meses de outubro a maio, no Círculo das Artes de Lugo. O Executivo Provincial colabora cunha achega económica de 9.000 euros para a celebración de concertos durante todo o ano. Pola súa parte, o Concello de Lugo colabora coa sociedade con 5.000 euros.

Carmen Basadre agradeceulle á Sociedade Filharmónica de Lugo que organicen un evento tan importante como este, “que enche a nosa cidade de cultura musical e co que se ten en conta á xente nova que está comezando no mundo da música clásica”.

Pola súa banda, Pilar García aproveitou a ocasión para felicitar a Sociedade Filarmónica de Lugo por “levar acabo este tipo de programacións lúdico-culturais, como os concertos que hoxe presentamos, dende o ano 1947 e contribuír, deste xeito, a facer de Lugo unha cidade cunha cultura musical histórica e importante. Dende o Goberno da Deputación colaboramos con este tipo de iniciativas co obxectivo de achegar, fomentar e difundir a música clásica nos cidadáns, ao tempo que ofrecemos audicións de destacadas agrupacións e solistas de todo o mundo”. 

As entradas para as persoas non socias pódense mercar nas oficinas do Círculo das Artes. Os interesados en facerse socios da Sociedade Filarmónica de Lugo pódense inscribir en filarmonicadelugo@gmail.com. A cota mensual é de 11 euros. Ademais, os alumnos do Campus Terra da USC e do Conservatorio de Lugo terán entrada gratuíta en todos os concertos.

Programación de concertos

Todos os concertos da nova tempada da Sociedade Filarmónica de Lugo, coa que colaboran Concello e Deputación de Lugo, terán lugar ás 20:00 horas no Círculo das Artes de Lugo. As datas e artistas e agrupacións que participan este ano son:

- O 25 de outubro, Camerata OSG con Vladimir Rosinskj de director.

- O 21 de novembro, Airas Ensemble con Haruna Takebe o piano.

- O 1 de decembro, Trío Camilli con Viktor Stenhjem, Óscar Alabau e Jean-Sélim Abdelmoula.

- O 17 de decembro, a Banda Filharmónica de Lugo con Iván Martínez Sabio de director.

- O 20 de xaneiro, a Orquestra Sinfónica Vigo 430 con Amihai Grosz á viola.

- O 28 de febreiro, Brahms Project con Josep Colomé, Joaquín Riquelme, David Apellániz e Enrique Bagaría.

- O 8 de marzo, a Real Filharmonía de Galicia con Paulo Gaio Lima ao violonchelo.

- O 24 de marzo, a Orquestra Sinfónica Vigo 430 co coro Rías Baixas.

- O 10 de abril, Quantum Ensemble.

- O 5 de maio, El León de Oro (LDO) con Marco Antonio García de Paz de director.

Sociedade Filarmónica de Lugo

Por iniciativa dun grupo de lucenses, sensibles á tradición polifónica da cidade e excelentes compoñentes dun conxunto de pulso e puga chamado Rocho Musical, fundouse  en decembro de 1.946 a Sociedade Filarmónica de Lugo, tendo como finalidade o fomento e difusión da arte musical. Comeza a súa actividade social o 17 de Maio de 1.947 cun concerto a cargo da Orquestra Municipal de Bilbao. Desde entón e ininterrompidamente leva organizadas máis de 600 actuacións que fixeron posible a audición en Lugo de destacadas agrupacións e solistas de todo o mundo. Como entidade cultural relevante, contribuíu á fundación do Patronato Pro-Música colaborando na institución das Semanas de Música do Corpus Lucense e na creación do Conservatorio.