A alcaldesa de Lugo, Paula Alvarellos, participou esta mañá no minuto de silencio celebrado ante a Subdelegación do Goberno en memoria das vítimas mortais da DANA na Comunitat Valenciana e Castela-A Mancha. Este acto de respecto e solidariedade foi convocado polo Goberno de España, coincidindo co inicio das tres xornadas de loito oficial decretadas en todo o país.

Previamente celebrouse unha Xunta de Voceiros extraordiaria onde, con absoluto consenso, os tres grupos da Corporación determinaron a SUSPENSIÓN do Pleno convocado para hoxe, en respecto ao loito nacional decretado. A sesión levarase a cabo o próximo luns, ás 10.

O Concello de Lugo únese así ao fondo sentimento de pesar que conmove a todo o país polas drásticas consecuencias que está a ter a Dana que estes días afecta a boa parte do territorio nacional.

En sinal de dó coas familias e seres queridos das persoas falecidas e desaparecidas, as bandeiras oficiais do Concello ondearán até o domingo a media asta e nas interiores loce tamén un crespón negro como mostra de condolencia e apoio aos territorios damnificados.

Igualmente quedan tamén cancelados todos os actos públicos oficiais organizados pola Administración local durante estes tres días de loito e nos de carácter privado tampouco haberá representación oficial.

Dende o Concello de Lugo queremos trasladar o noso máis sentido pésame a todas as persoas afectadas polas choivas torrenciais e tamén o noso recoñecemento e alento a todos os servizos de seguridade e emerxencias e a todos os operativos que están a traballar nas zonas máis prexudicadas.