A Alcaldesa de Lugo, Lara Méndez, o Deputado de Relacións Institucionais, Álvaro Santos, a Subdelegada do Goberno, Isabel Rodríguez, e o Presidente de ASOPORCEL, José Barreira, inauguraron a II Xornada Técnica Monográfica do Porco Celta en Galicia, que acolle o Pazo de Feiras e Congresos de Lugo este sábado.

No acto, Méndez loubou o traballo e esforzo de ASOPORCEL, que aposta polo impulso da comercialización de porco celta, sendo hoxe un producto de calidade moi demandado no mercado nacional e internacional, facendo posible que se incrementen as posibilidades de creación de emprego no rural. 

Nesta liña, a Alcaldesa amosou o compromiso do Goberno polo rural de Lugo, como o investimento de 4M€ no que vai de mandato na dotación e mellora de servizos e infraestruturas nas 54 parroquias lucenses, vantaxes fiscais, como a bonificación máxima, do 95%, da cota íntegra do IBI das explotacións vinculadas co sector primario e a rebaixa do 50% do ICIO nas licenzas de explotacións agrodandeiras e forestais, ou a posta en marcha da oficina de atención do rural, que ofrece información e asesoramento gratuítos.