"O Concello non perdeu unha subvención de educación como di o PP, renunciou a ela” aclarou Felipe Rivas

“Unha administración non pode contratar, executar e xustificar obras nun prazo de 15 días e o sr. Carballo sabeo perfectamente ” sinalou o edil de Educación. Para o concelleiro de educación “se o PP quere que se acceda as axudas da Xunta deberán dar prazos axeitados e ter o ánimo de colaborar cos concellos”

Venres, 20 de decembro de 2019
Fonte: 
Gabinete de Prensa

O concelleiro de Eudación e Difusión do Coñecemento, Felipe Rivas, lembrou que “foi o concello que renunciou a unha axuda da Xunta de Galicia, non é que a perdésemos”. A subvención permitiría realizar investimentos para mellorar as escolas infantís Luís Soto Menor, María Wonenburger, Serra de Outes e Gregorio Sanz cun total de 25.043,23€. Segundo explicou o concelleiro de educación, a Xunta deu de prazo de 15 días no que debían presentar a documentación relativa a todas as actuacións realizadas con estas axudas antes do día 5 de decembro. “Nun prazo de 15 días non é posible contratar, realizar as obras, facer os trámites administrativos e xustificar o importe das axudas”, declarou Felipe Rivas.

Segundo indicou o concelleiro de Educación, o Concello de Lugo solicitou unha prórroga do prazo o 21 de novembro, mentres dende a concellería se realizaban os trámites para tentar non ter que renunciar “ante a imposibilidade material de cumprir eses prazos”, declarou o edil responsable, que engadiu “unha vez se nos notificou a denegación da prórroga, vímonos na obriga de renunciar á axuda”.

A Xunta de Galicia abriu o prazo o pasado 8 de agosto, presentando o Concello a solicitude o 20 de setembro. O 22 de novembro publicouse no DOG a resolución, adxudicándose ao concello de Lugo un total de 25.043,23€ para estas melloras. Felipe Rivas denunciou “o maltrato que a Xunta de Galicia da aos servizos públicos”, e explicou que “para unha institución é imposible realizar toda a tramitación administrativa destas melloras con tan pouco prazo”.

Noticias relacionadas