A concelleira de Benestar acudirá a esta convocatoria na que o Executivo de Lara Méndez é exemplo polo seu compromiso permanente con proxectos de calado solidario.
A cita, que terá lugar entre o 10 e o 12 de novembro en Córdoba pretende abordar as políticas públicas de colaboración e os retos que se aveciñan ante o contexto actual.
A concelleira de Benestar, Olga López Racamonde, participa estes días no Encontro Estatal de Gobernos Locais e Cooperación ao Desenvolvemento.
Unha cita á que o Concello de Lugo acode debido ao compromiso permanente que mantén con proxectos de colaboración solidaria entre os que se atopa a iniciativa Lugo por un Comercio Xusto.
“O propio Fondo Galego de Cooperación convidounos persoalmente a asistir por considerar que Lugo é un caso excepcional, pola súa implicación, ao que cómpre visibilizar”, explicou a edil.
O evento, que terá lugar dende hoxe e até o vindeiro 12 de novembro en Córdoba, será o escenario de diálogos políticos, obradoiros e intercambios técnicos que terán como eixo común o debate sobre a cooperación descentralizada municipal, como clave para definir o rol dos executivos locais no sistema estatal de cooperación, fronte á incipiente reforma legal.
“Trátase dunhas xornadas tremendamente útiles e interesantes, nas que representantes políticos e institucionais de todo o Estado abordaremos a acción territorial e as súas redes no marco da Unión Europea en materia de cooperación e axuda ao desenvolvemento, tendo en conta o contexto actual e os retos que presenta de cara ao futuro”, sinalou López Racamonde.
A responsable da área de Benestar, quixo agradecer ao Fondo Galego de Cooperación que escollese ao Concello de Lugo en representación do municipalismo autonómico máis solidario “o que pon de manifesto o calado e proxección das nosas actuacións ás que cada ano destinamos unha partida de 10.000 € do noso orzamento para accións de sensibilización social - afirmou a edil - que neste 2021 se centraron na intervención educativa, en obradoiros formativos para persoas voluntarias e mesmo na celebración dun ciclo en colaboración co Campus Terra de Lugo dentro do que se impartiron sesións sobre cartografía participativa e sistemas de información xeográfica, redes de mulleres produtoras e cadeas de comercialización, dereitos humanos, ferramentas didácticas para a ensinanza, etc...”.
Precisamente, López Racamonde intervirá no espazo chamado ÁGORA PATIO dedicado á presentación de programas e boas prácticas de cooperación internacional nun formato áxil e rápido.
“Un espazo de reflexión, intercambio e construcción colectiva, específico sobre a cooperación municipal, no que queremos poñer en valor a acción que desenvolvemos dende a área de Benestar, compartindo as nosas experiencias para, entre todos os e as participantes, poidamos establecer logo unha folla de ruta e coñecer a incidencia que esta terá no proceso de reforma da nova arquitectura do sistema”, aclarou a concelleira.
O Encontro está impulsado pola Confederación de Fondos de Cooperación e Solidariedade (COFOCOS), na que o Fondo Galego ocupa a Vicepresidencia, e coorganizado polo FAMSI (Fondo Andaluz de Municipios para a Solidariedade Internacional) e a FEMP, e financiado pola Dirección General de Políticas de Desarrollo Sostenible.
Audio
- A concelleira de Benestar, Olga López Racamonde, sobre o Encontro Estatal de Goberno Locais | Descargar mp3
