A Alcaldesa de Lugo, Lara Méndez, anunciou este luns que o Ministerio de Facenda e Administracións Públicas vén de conceder ao Concello o proxecto Muramiñae, Da Muralla o Miño, enmarcado dentro da convocatoria de fondos europeos de Desenvolvemento Urbano Sostible Integrado (DUSI). Deste xeito, Lugo disporá de 10 millóns de euros para integrar o Miño na cidade a través do Carme e facer así unha cidade máis verde, máis sostible máis integradora e máis moderna, tal e como explicou a rexedora, quen lembrou que este proxecto se suma a outros que levan cristalizando ao longo do ano, onde o Concello concorreu a máis de 20 millóns para a cidade, unha cifra que redundará no conxunto de Lugo.

“Grazas aos fondos FEDER imos ser máis e mellor cidade. As cidades son para que as persoas as disfruten, e con esta estratexia, recuperaremos máis espazos para que elas sexan protagonistas”, asegurou Lara Méndez.

Muramiñae, un proxecto de todos e para todos

Muramiñae está conseguido grazas ao esforzo do Goberno anterior, que fixo ao Concello acredor da boa xestión de fondos europeos, pero tamén grazas a uns técnicos municipais excelentes e cunha capacidade de traballo insuperable, e ao esforzo político do Goberno Municipal que pelexou para ser adxudicatario.  De feito, tal e como apuntou a Alcaldesa, dos 83 millóns desta convocatoria dirixidos para Galicia, das 7 grandes cidades galegas foron beneficiarias 4, entre elas Lugo.

Este traballo tamén incorpora o sentir desta Corporación, que soubo ver que o Miño ten un potencial sen rival como zona de lecer, así como as achegas da cidadanía. “Por iso é un proxecto de cidade, de toda a cidadanía”, asegurou Méndez, quen subliñou que se trata ademais dun proxecto transversal, elaborado por distintos departamentos da entidade local.

Orzamento

O proxecto, que ten un prazo de execución de 4 anos, conta cun orzamento de 12.050.000 euros, dos que o Ministerio achega o 80%, é a través do Fondo Europeo de Desenvolvemento Rexional (FEDER), e o Concello o resto, o 20%, uns 2,5 millóns de euros. 

Liñas estratéxicas

Co obxectivo de unir a cidade e o río a través da zona do Carmen, eliminar a descontinuidade urbana que existe entre a Porta Miñá e o Miño, aproveitando ademais que discorre o Camiño de Santiago, e integrar o entorno fluvial na cidade, Muramiñae inclúe unha serie de actuacións que poden agruparse nas seguintes 7 liñas estratéxicas:

1.- Revitalización da zona do Carmen con accións de humanización e ordenación urbanística.

2.- Posta en valor do patrimonio:

• Acondicionamento da traza do Camiño de Santiago
• Estudo arqueolóxico da zona e creación de novas ventás arqueolóxicas, elaboración de material didáctico, e posta en valor dos restos arqueolóxicos das Termas Romanas

3.- Creación de novas conexións a pé, en bicicleta e rodadas entre a trama urbana e o río para favorecer a mobilidade e o acceso a zonas de esparexemento e deportivas situadas no entorno do Miño, como o estadio de fútbol Anxo Carro, o Pazo de Feiras e Congresos ou o Club Fluvial.

Entre outras medidas, inclúense:

• Crear un acceso rodado á altura da Volta da Viña que conecte directamente coa N-VI en sentido A Coruña, evitando así o rodeo que os condutores teñen que facer na actualidade. Isto mellorará a seguridade de vehículos e peóns e permitirá peonalizar a Calzada da Ponte, actuación tamén contemplada neste proxecto.
• Construír unha pasarela sobre a estrada nacional e ampliar o paso subterráneo
• Acondicionar un acceso que permita chegar a pé á zona fluvial, o que contribuirá a diminuír o tráfico rodado e humanizar a cidade
• Potenciar o uso do transporte público coa ampliación e a modernización da rede de transporte; desenvolver un plan de mobilidade en bicicleta, e a intermodalidade entre o transporte público e a bicicleta

4.- Impulso do entorno fluvial con novas actividades e dotacións culturais, así como accións de protección da ribeira e rexeneración de espazos. Entre outras medidas, proponse a creación dun parque temático da cultura castrexo romana no entorno fluvial que recree esta época e que acolla actividades divulgativas, con aportacións das asociacións culturais da cidade vinculadas ao Arde Lucus.

5.- Estimular a creación de emprego e a inserción sociolaboral, e apoiar o emprendemento a través de iniciativas relacionadas coa revalorización dos recursos naturais e patrimoniais.

6.- Potenciar o uso das novas tecnoloxías para ampliar os servizos públicos prestados aos cidadáns e poder facelo con máis eficacia e eficiencia, mellorar a transparencia, e impulsar a participación cidadá e a estratexia de Goberno Aberto.
Entre outras actuacións, inclúese:

• Modernizar a Administración Electrónica
• Ampliar os servizos dispoñibles da Tarxeta Cidadá para atraer novos usuarios e mesmo crear unha App cos servizos e virtualizar a tarxeta
• Desenvolver unha plataforma con navegador xeográfico –XIS- para a xestión intelixente das infraestruturas locais e o mobiliario urbano
• Crear unha plataforma de participación cidadá, unha aplicación que permita xestionar as súas solicitudes e iniciativas, e un sistema que permita realizar notificacións masivas aos veciños en función dos seus intereses

7.- Medidas de aforro enerxético e medioambientais:

• Instalación de dispositivos de aforro enerxético
• Sistemas de xestión que permitirán o control punto a punto da rede de alumeado para conseguir un consumo eficiente
• Renovación do equipamento
• Implementación dun sistema de toma de datos e análise que axude a identificar accións para optimizar o consumo
• Fomento da reciclaxe orgánica

Co Muramiñae, ademais dunha importante transformación do entorno comprendido entre a Porta Miñá e o río Miño, o Goberno busca potenciar o turismo como motor económico do concello, mellorar a mobilidade e converter o río nun elemento dinamizador máis.

“Grazas ao Muramiñae, Lugo vai ser unha cidade máis humana”, asegurou a Alcaldesa, ao tempo que afirmaba con rotundidade que “Lugo é un gran lugar para vivir. Témolo case todo: patrimonio, gastronomía, arte, lecer, turismo, e agora, imos telo todo introducindo o río na cotidianidade do día a día dos lucenses. Con este proxecto Lugo ábrese ao Miño”, concluíu a rexedora. 

Audio

• Lara Méndez, sobre o proxecto Muramiñae |Descargar mp3